Negosiante husu autoridade Bobonaru prepara kaixote lixu móvel iha merkadu Maliana
BOBONARU, 29 Setembru 2026 (TATOLI)-Negosiante sira no komunidade husu ba Diresaun Servisu Munisipál Água no Saneamentu (DSMASA) Autoridade Munisípiu Bobonaru atu prepara kaixote ka fatin lixu móvel iha merkadu Maliana hodi halibur lixu plastiku, aqua no suratahan ne’ebé naklekar iha dalan-ninin no valeta laran.
“Lixu plástiku ho aqua mak barak liu. Loroloron ema soe arbiru de’it, balun hemu tiha aqua tun husi karreta soe de’it tanba fatin laiha, dalaruma ami sira loja-na’in mak halibur, más tempu la to’o tanba ema barak. Ami hanoin tau fatin lixu ida masa ne’e para fasilita ema soe lixu iha nia fatin”, negosiante Domingas da Costa hatete ba Tatoli, iha Maliana, ohin.
Komunidade Adelino Barreto reforsa katak kaixote lixu ne’e importante tebes atu garante ambiente mós no ijiene.
Nia dehan lixu iha Maliana kompleksu, tanba ne’e husu ba Autoridade Munisípiu Bobonaru atu aselera implementasaun sirkulár ijiene no orden públika.
“Aplika ona para sé mak so’e lixu arbiru fó sansaun ba nia, para nia ta’uk labele halo tan. Se la’e kapitál munisípiu ne’e ita haree fo’er nakonu, tanba maioria ema laiha konxiénsia, entaun ita presiza aplika regra forte parte oganiza ema hotu-hotu atu haloot lixu iha nia fatin no labele soe arbiru”, nia sujere.
Xefe Departamentu Planeamentu SMASA, Adriano Berre, relata katak daudaun ne’e karreta rua no pesoál saneamentu 17 mak rekolla lixu kada loron no tempu badak kompañia sei prepara fatin lixu móvel iha merkadu Maliana.
“Agora kompañia sira prepara hela, tanba halo fatin lixu haat ne’e sira mak sei halo hotu para ema han rebuxadu ka hemu bee aqua mamuk bele tau iha fatin”, nia dehan.
Dadaun ne’e, SMASA tau ona fatin lixu móvel iha Jardín Setembru Negro Maliana no konstrui fatin lixu provizoriu haat iha Ramaskora, Balibó no fatin seluk tan.
Notísia relevante: SMASA Bobonaru planeia prepara fatin lixu haat iha kapitál Maliana
Jornalista: Sergio da Cruz
Editora:Maria Auxiliadora
