BOBONARU, 03 Abríl 2025 (TATOLI)—Diresaun Servisu Munisipál Agua no Saneamentu e Ambiente (SMASA) munisípiu Bobonaru iha Planu Asaun Anuál (PAA) tinan fiskál 2026 sei prevee orsamentu atu prepara fatin lixu haat iha kapitál Maliana hodi fasilita ekipa saneamentu halo rekollamentu kada loron, tanba daudaun ne’e komunidade soe de’it lixu iha dalan ninin.
Diretór Diresaun Servisu Munisipál Agua no Saneamentu e Ambiente (SMASA) munisípiu Bobonaru, Armindo Cardoso Barros, hateten fatin sira-ne’e mak hanesan iha Ramaskora, ida besik Kampu Futeból Maliana no ida prepara iha Merkadu Mau-Mali.
Notísia Relevante: Kompañia Caltech resikla lixu ba valór ekonómiku
“Ami mós prepara planu ona prepara fatin lixu para komunidade bele tau, depois mak ami ba foti. Agora, sementara ne’e sira tau de’it iha karon ho doss sira soe iha dalan ninin,” Nia informa ba Agência Tatoli, iha nia kna’ar fatin, kinta ne’e.
Nia hateten, iha Planua Asaun Anuál (PAA) tinan 2026, SMASA mós prevee orsamentu atu konstrui tan fatin lixeira foun iha parte postu Administrativu Balibo.
Nia observa durante ne’e komunidade balun haloot lixu ho di’ak, maibé balun laiha konsiénsia hodi soe naklekar arbiru iha espasu públiku no fatin ne’ebé ekipa SMASA identifika volume lixu barak liu mak iha merkadu sentrál Maliana.
“Agora daudauk maske ita foti lixu kada loron, maibé ita foti tiha orsida iha tan, barak-liu iha merkadu. Ezemplu sábadu ho Domingu kan la servisu, entaun segunda tama ne’e barak loos, ne’e sira raut iha ne’ebá ne’e, presiza karreta ret ou lima hanesan ne’e,” nia dehan.
Maske hasoru problema, maibé nia dehan, atividade rekollamentu lixu rutinamente dala-rua kada loron hahú husi segunda to’o sesta hodi garante Maliana sai kapitál ne’ebé moos.
“Sira la’o ho mapeamentu, husi Soso ba iha Rotunda, depois Rotunda ba Pemancar, depois iha Rotunda ba fali Merkadu, Buracha-laran, depois ba fali Obor sai fali iha Edifisíu BNCTL nian ne’e. Aleinde ne’e, iha fatin seluk komunidade soe foer hamutuk mak sira ba tula, fatin babain sira tula ne’e iha Ramaskora ne’e fatin, raut hotu tiha ba soe iha Lixeira Maulorek,” nia dehan.
Enkuantu daudaun ne’e karreta rua, unidade ida Estadu nia no unidade ida Alugur mak halo operasaun rekolla lixu no pesoál Saneamentu hamutuk na’in-21 ne’ebé Kolokadu iha merkadu Maliana na’in-haat (4), espasu públiku 15 no iha Lixeira Malore na’in-rua (2) mak servisu iha terrenu.
Notísia Relevante: Loja Zang Feng selu karreta $50 soe lixu iha Tibar
Jornalista : Sergio da Cruz
Editór : Cancio Ximenes
