iklan

DILI

Loja Zang Feng selu karreta $50 soe lixu iha Tibar

Loja Zang Feng selu karreta $50 soe lixu iha Tibar

Loza na'in, Lin Chang Fang

DILI, 27 Janeiru 2025 (TATOLI) – Loja Zang Feng ne’ebé lokaliza iha área Quintal Boot, kada fulan selu karreta $50 hodi tula lixu ba fakar iha Tibar.

“Ami-nia maneira ne’e kuidadu no kontrola lixu iha ami-nia loja mak foti lixu hanesan doos, ne’e ha’u hamutuk to’o fulan ida mak selu karreta ne’ebé besik ami ho kustu $50 mak tula ba soe iha Tibar. Ami nunka soe iha dalan públiku”, Loja na’in, Afun Zang, hateten iha Quintal Boot Dili, segunda ne’e.

Afun hatutan, lixu sempre lori ba Tibar iha kada fulan tanba sasán kmaan ne’ebé bele lulun hamutuk tau halo didi’ak hafoin to’o fulan ida mak foin so’e.

“Ita ne’e sempre kontribui ba moos no ijiene entaun ami ne’e tau prioritiza mak tenke moos, nune’e bele atrai ema sosa sasán. Ita-nia sasán atu folin mós halo parte fatin moos no furak, entaun ami loza na’in sempre haruka traballadór sira ne’e tau lixu hamutuk iha loza kotuk depois barak ona mak foin ba soe iha Tibar”, nia dehan.

Iha fatin seluk, Loza na’in, Loza 189 WM, UNIP Lda, Lin Chang Fang, hatete, lixu hirak ne’e la soe iha dalan públiku no sempre lori ba Tibar ho transporte mesak.

“Lixu ami nunka tau iha lixeiru ne’ebé Governu prepara iha dalan públiku ka naran soe iha dalan públiku maibé ami-nia lixu ne’e tau iha loza kotuk bainhira nakonu fatin ne’e mak ami foin lori ba Tibar. Ami ida-idak tula ami-nia lixu ne’e, depois lixu ne’e la’os hein to’o fulan mak tula, lae maibé kuandu barak ona ami tula ba Tibar”, nia dehan.

Nia dehan, loza ne’e só prodús de’it mak dos, karon ne’ebé falun ba sasán sira, iha ne’e lixu bokon laiha.

“Ami-nia loza ida-ne’e la prodús lixu bokon tanba sasán ne’ebé tama iha ami-nia loza ne’e só doos boot no iha ne’e la uza plástiku, entaun lixu ne’e mesak kmaan no fasil ba ami aruma no barak mak foin ami transporta”, nia dehan.

Xefe Departamentu Saneamentu Munisípiu Dili, Domingos Soriano, husu ba komunidade atu soe lixu tuir oráriu ne’ebé tau ona iha dekretu lei 33/2008.

Oráriu soe lixu ne’e sei hahú hosi tuku 04h30 madrugada to’o 07h00 dadeersan, nune’e bele fasilita empreza sira foti lixu hodi bele so’e iha lixeira Tibar.

“Bazeia ba dekretu lei 33/2008, iha ne’ebá ami mós uza formula ida katak liuhosi sirkulár neʼebé ami fó sai ba ema hotu iha tinan kotuk katak oráriu soe lixu hahú iha tuku 04h30 madrugada to’o 07h00 dadeersan. Hosi tuku 07h00 dadeer to’o fali tuku 07h00 kalan, ida-ne’e servisu ami- nian. Ida-ne’e ami foti de’it foer no komunidade sei labele soe tan foer iha tempu ne’ebá”, nia dehan.

Dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiéne no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mensajen publisitária no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Jornalista: Osória Marques

Editór : Zezito Silva

iklan
iklan

Leave a Reply

iklan
error: Content is protected !!