Agrikultór sira preokupa ho ai-manas importadu ilegál ne’ebé domina merkadu Maliana
BOBONARU, 30 Setembru 2026 (TATOLI) – Agrikultór sira iha aldeia Timatan, suku Ritabou, postu administrativu Maliana, munisípiu Bobonaru, enfrenta difikuldade atu fa’an sira-nia produtu, liuliu ai-manas tanba ai-manas importadu husi área Builalu no Haikesak munisípiu Belu, Provínsia Nusa Tengara Timur, Indonézia, ne’ebé tama ilegalmente husi fronteira fa’an ona iha merkadu Maliana ho folin baratu.
Agrikultór ai-manas iha suku Ritabou, Lourdes Arménia, hatete katak ai-manas ilegál halo folin ai-manas lokál tun, nune’e afeta diretamente rendimentu agrikultór sira ne’ebé depende ba produsaun ne’e atu sustenta nesesidade família.
“Ami kuda ai-manas atu sustenta oan sira eskola. Maibé, ami-nia ai-manas la folin tanba sira hatama ilegál maka’as. Ami fa’an balde ida $1, ami tenke tuir folin sira-nian”, nia lamenta iha kuarta-feira ne’e ba jornalista sira.
Nia hatete katak iha tinan kotuk folin ai-manas kada balde tun to’o $0,50, maibé agora foin mak sa’e ba $1,50, maski nune’e, entrada ai-manas ilegál halo agrikultór sira la konsege hetan rendimentu ne’ebé di’ak.
“Uluk liu ami hetan maka’as, más tinan kotuk hetan de’it osan $500 iha kolleta ikus. Se ai-manas ilegál la tama, ami bele hetan osan barak liu”, nia dehan.
Lourdes mós husu ba Governu no autoridade seguransa atu kontrola entrada ai-manas ilegál iha fronteira, atu fó oportunidade ba produtu lokál sira atu hetan folin di’ak iha merkadu.
“Ami sente triste no lakon. Atu dehan katak ami-nia ai-manas barak fa’an bá merkadu ne’e to’o hela, se Governu la taka ilegál, ami sei susar nafatin, tanba uluk ami lori bá merkadu ema la hola, ami naran fa’an ember ida $0,50 de’it”, nia relata.
Agrikultór seluk, Manuel Guilherme, realsa katak sira hato’o ona problema entrada ai-manas ilegál ne’e ba lideransa suku no aldeia, inklui autoridade seguransa iha fronteira Batugadé, maibé atividade ilísitu ne’e kontinua buras.
“Tinan uluk ami hatama surat ba UPF iha fronteira Batugadé. Sira dehan depois mak ami sei haree, maibé semana ida liu tiha, ai-manas ilegál kontinua tama no ami-nia ai-manas la folin nafatin”, nia akrexenta.
Manuel haktuir katak sira hatene kona-ba entrada ai-manas ilegál ne’e liuhusi informasaun ema sira ne’ebé sosa diretamente iha komersiante nasaun viziña Indonézia.
Ai-manas ilegál ne’e Manuel subliña tama husi parte Haikesak, Indonézia, no lori bá merkadu Maliana. “Se sira fa’an ember ida $2 no ami fa’an $3, ema hotu halai ba sira, nne’e mak halo ami-nia ai-manas la folin”, nia relata.
Manuel hatete katak agrikultór sira hahú kuda ai-manas iha fulan-Maiu depois prepara musan iha Fevereiru, no komesa kolleta iha Setembru.
Tuir nia, iha rai ektare ida agrikultór bele halo kolleta dala rua ka tolu. “Tinan uluk ai-manas ilegál tama ne’e ami halo ektare ida hetan de’it $1.000. Tinan ne’e mak la hatene, ai-manas ilegál tama nafatin ami lakon nafatin, tanba tinan uluk ami halo ember ida fa’an ho $5 to’o $7, más ilegál nia tama mai ami dalaruma fa’an de’it ember ida $2 ou $3 de’it”, nia hato’o.
Notísia relevante: Merkadu TTU presiza produtu ‘sukaer’ husi Oekusi
Jornalista: Sergio da Cruz
Editora: Maria Auxiliadora
