APC Bobonaru apoia ona pakote emerjénsia ba vítima dezastre naturál hamutuk 188
BOBONARU, 30 Setembru 2026 (TATOLI)-Autoridade Protesaun Sivíl (APC) Munisípiu Bobonaru, entre Janeiru no Setembru 2026, entrega ona pakote emerjénsia hanesan ai-han no la’ós ai-han ba vítima dezastre naturál hamutuk 188.
Komandante APC Munisípiu Bobonaru, Zeca Michael Lopes, informa katak dezastre naturál ne’e akontese iha tempu udan mak barak liu hanesan inundasaun no hahú husi Abríl to’o Setembru maioria akontese inséndiu, inklui anin sobu uma no inséndiu florestál rua.
“Foin lalais iha Bobonaru suku Soilesu kalan mak ahi han, kala komunidade sunu rai atu halo to’os ne’e mak afeta uitoan ba rai kuaze ektare haat, maibé la afeta ba komunidade nia uma. Depois foin dadaun loron tolu kotuk ba mós akontese ahi han iha postu Balibó, suku Leolima. Momentu ne’e, guarda floresta sira mak kombate ahi, maibé la rejista ema ruma mak vítima, ka mate”, nia dehan.
Zeca Lopes husu ba komunidade Bobonaru atu halo prevensaun antisipadamente hasoru El Niño. “Agora liuhusi Meteorolijia fó sai ona Timor-Leste hasoru bailoro naruk, husu komunidade atu konserva bee-matan, kuda ai-oan ba, kuidadu hahÁn para rai ba tempu naruk uitoan depois labele sunu rai arbiru”, nia alerta.
APC mós identifika katak postu administrativu Atabae, Kailaku no Balibó, sai fatin risku ba inundasaun, enkuantu postu Bobonaru no Lolotoe risku ba anin-boot no rai-halai.
Notísia relevante: APC Bobonaru rejista dezastre naturál 172 durante Janeiru-Jullu
Jornalista: Sergio da Cruz
Editora: Maria Auxiliadora
