APC Bobonaru rejista dezastre naturál 172 durante Janeiru-Jullu
BOBONARU, 03 Agostu 2026 (TATOLI) – Autoridade Protesaun Sivíl (APC, sigla portugés) Munisípiu Bobonaru rejista kazu dezastre naturál 172 durante períodu Janeiru to’o Jullu 2026. Husi totál ne’e, kazu 34 tama iha kategoria atu simu apoiu rekuperasaun ba vítima sira.
Komandante Interinu APC Bobonaru, Eusébio Fernandes da Cruz, hateten vítima 34 ne’ebé sei hetan apoia rekuperasaun kompostu husi uma aat totál 22, aat natoon lima no kmaan hitu.
“Vítima hotu ne’ebé afetada husi dezastre ne’e ami fó tiha ona apoiu emerjénsia, hanesan ai-han no materiál la’ós ai-han, tanba ai-han sira iha armazein prontu atu responde bainhira dezastre akontese. Hein de’it apoia rekuperasaun ba sira ne’ebé tama iha kategoria atu hetan rekuperasaun”, Eusébio dehan.
Komandante Korpu Bombeiru Bobonaru ne’e esplika katak prosesu apoia rekuperasaun ba vítima sira ne’ebé afetada durante tinan 2026 seidauk distribui tanba proposta ne’e manda tiha ona ba nivel nasionál no hein desizaun tuir mekanizmu Governu no disponibilidade orsamentál.
“Vítima sira iha tinan 2025 hetan ona apoiu rekuperasaun. Ba vítima sira husi Janeiru 2026 mai, ami haruka ona dadus ba nasionál no agora hein prosesu atu implementa tuir faze no orsamentu Governu”, nia dehan.
Relasiona ho esforsu prevensaun, APC Bobonaru kontinua halo sensibilizasaun ba komunidade iha suku hotu atu hamenus risku dezastre naturál.
Tuir Eusébio, ekipa APC fó orientasaun ba komunidade ne’ebé hela besik ai-hun boot, fatin rai-halai no área sira seluk ne’ebé iha poténsia ameasa ba vida no patrimóniu.
Notísia relevante: APC apoia materiál rekuperasaun ba vítima dezastre naturál 87 iha Bobonaru
“Ami tama ona bá suku hotu iha Bobonaru atu fó informasaun kona-ba prevensaun. Iha planu atu kontinua to’o aldeia sira tanba risku bele prevene liuhusi edukasaun no preparasaun, maski dezastre naturál ne’ebé mai tanba mudansa klimátika labele prevee ho loloos”, realsa.
APC apela ba komunidade atu kontinua halo prevensaun no tuir orientasaun autoridade sira hodi hamenus impaktu ba dezastre naturál iha futuru.
Notísia relevante: APC alerta ba komunidade Bobonaru hadook-an husi fatin risku
Jornalista: Sergio da Cruz
Editora: Maria Auxiliadora
