Edukasaun Kovalima ezekuta ona orsamentu merendah eskolar millaun $1-resin
KOVALIMA, 30 Setembru 2026 (TATOLI) – Servisu Edukasaun Munisípiu Kovalima ezekuta ona orsamentu Programa Merenda Eskolár (PME) hamutuk US$1.059.061, husi totál orsamentu tinan 2026 ne’ebé hamutuk US$1.098.305. Saldu orsamentu ne’ebé restu hamutuk US$39.244 sei fila ba kofre Estadu.
Xefe Departamentu Jestaun Programa Edukasaun, Gregório Ferreira Afonso, hateten katak programa PME tinan 2026 sei hala’o durante loron 148. To’o agora, implementasaun lao ona durante loron 115, no falta loron 33 atu kompleta programa.
“Programa merenda eskolár ba tinan 2026 ita implementa durante loron 148. To’o dadaun ne’e, ita implementa ona PME durante loron 115, ho orsamentu ne’ebé ezekuta hamutuk US$1.059.061. Falta de’it loron 33 nia implementasaun,” Gregório Ferreira Afonso relata ba jornalista sira iha Santa Rosa.
Nia esplika katak orsamentu restu sei fila ba kofre Estadu tanba iha diferensa entre númeru estudante ne’ebé prevee iha orsamentu ho númeru estudante ne’ebé partisipa iha implementasaun PME. Edukasaun Kovalima prevee estudante hamutuk 17.669, maibé iha implementasaun PME rejista estudante 16.614.
Edukasaun Kovalima implementa PME bazeia ba kalendáriu ne’ebé Ministériu Edukasaun determina. Durante implementasaun, iha difikuldade iha área rural atu hetan ai-fuan ba merenda estudante, hanesan pateka,ne’ebé iha tempu balu troka ho hudi no ai-dila.
Xefe Departamentu Jestaun Programa Edukasaun husu públiku atu kontinua monitoriza implementasaun PME. Se implementasaun la tuir menu ne’ebé determina, públiku bele hato’o informasaun ba Servisu Edukasaun Munisípiu Kovalima atu bele buka solusaun.
Programa PME nia objetivu mak atu aumenta partisipasaun estudante iha prosesu aprendizajen no suporta dezenvolvimentu sira nia kapasidade, tanba estudante sira mak futuru ba dezenvolvimentu nasaun.
Antes, orsamentu PME jere husi Ekipa Jestaun Programa (EJP). Maibé, hahú iha 2026, jestaun implementasaun PME transfere ba eskola sira, nune’e autoridade munisípiu bele fasilita monitorizasaun ba implementasaun programa.
Jornalista: Celestina Teles
Editór: Florencio Miranda Ximenes
