Ian Martin: Filme ‘Rezisténsia 1975-1999’ hanorin jerasaun foun komprende istória luta ba liberdade
DÍLI, 29 Setembru 2026 (TATOLI) — Reprezentante Espesiál Sekretáriu-Jerál Nasaun Unida (ONU) ba Konsulta Populár iha Timor-Leste no Xefe Misaun UNAMET iha 1999, Ian Martin, konsidera lansamentu filme ‘Rezisténsia 1975-1999: Istória Timor-Leste nia Luta ba Liberdade’ ajuda hatutan istória pasadu hodi hanorin jerasaun foun komprende luta povu Timor-Leste.
Serimónia lansamentu filme dokumentáriu ne’e hala’o iha salaun Platinum Cineplex, Timor Plaza, Díli, Tersa (29/09).
Marka prezensa iha lansamentu filme ne’e inklui Primeiru Ministru Xanana Gusmão, membru Governu, korpu diplomátiku, membru parlamentu no reprezentante sosiedade sivíl.
Objetivu prinsipál husi filme dokumentáriu ne’e mak atu hatudu ba públiku, liuliu ba jerasaun foun, istória luta Timor-Leste ba liberdade liuhusi frente tolu – frente armada, diplomátika no klandestina, durante períodu 1974-1999.
Testemuñu husi funu-na’in sira ne’ebé partisipa diretamente iha luta ba independénsia, fó sasin kona-ba prosesu luta ba ukun-rasik-an iha filme ne’e.
“Ami kontente tebes bainhira Gabinete Primeiru-Ministru simu inisiativa ida-ne’e hodi produz ona filme ida-ne’ebé, tuir ha’u-nia hanoin, importante tebes”, nia afirma.
Diretór produsaun filme Rezisténsia 1975-1999, Ian White, hato’o ninia agradesimentu ba parte hotu ne’ebé fó konfiansa no responsabilidade ba nia atu hala’o projetu produsaun filme ne’e.
“Ha’u hakarak agradese ba ami-nia ekipa produsaun no Díli International Film Festival (DIFF) ba lansamentu filme ne’e,” White haktuir. “Ha’u mós hakarak agradese ba fonte sira-ne’ebé sai testemuña iha filme ida-ne’e.”
Nia hateten katak testemuña sira iha korajen atu konta sira-nia istória rasik, inklui funu-na’in sira ne’ebé luta ba independénsia Timor-Leste.
Diretora Ezekutiva Gabinete Fronteira Marítima, Elizabeth Exposto, hateten katak lansamentu filme ne’e sai pasu importante ba dezenvolvimentu filme iha Timor-Leste no lisaun di’ak ba produtor filme Timoroan.
“Ohin, ita hahú ho ita-nia istória rasik ne’ebé konta istória rezisténsia timoroan husi tinan 1975 to’o 1999,” Elizabeth dehan.
Hafoin asiste filme Rezisténsia 1975-1999, Primeiru-Ministru Kay Rala Xanana Gusmão no partisipante sira hatudu sentimentu emosionál, inklui hamonu matan-been no hakoak malu iha salaun Platinum Cineplex, Timor Plaza.
Jornalista: Alexandra da Costa
Editór: Filomeno Martins
