Jerente Banku Kaebauk relata vizaun no kompromisu ba Xefe Estadu
DILI, 30 Setembru 2026 (TATOLI)–Diretór Ezekutivu Banku Kaebauk, Ángelo Soares, hamutuk ho nia ekipa, Kuarta ne’e, hasoru malu ho Prezidente Repúblika, José Ramos-Horta, hodi relata vizaun, misaun no kompromisu banku.
“Objetivu primeiru ami mai hasoru Prezidente mak hato’o vizaun no kompromisu Kaebauk nu’udar banku komersiál privadu foun iha Timor-Leste ne’ebé foka ba servisu asesível, konfiável no responsável,” Ángelo Soares, hato’o hafoin hasoru malu ho Prezidente Ramos-Horta iha Palásiu Prezidensiál, Bairru Pité.
Notísia relevante : Kaebauk hetan ona lisensa BCTL atu sai banku komersiál
Iha enkontru ne’e, Jerente Banku Kaebauk konvida Prezidente Repúblika atu partisipa iha serimónia lansamentu ofisiál ne’ebé sei realiza iha 23 Outubru 2026. Iha biban ne’e kedan, Prezidente konfirma sei partisipa iha eventu ne’e.
Banku Kaebauk sei loke ofisialmente ninia servisu ba kliente no públiku hahú iha 26 Outubru 2026.
Ángelo Soares hateten, Kaebauk sei kontinua foka maka’as ba mikrokréditu nu’udar negósiu prinsipál no parte importante husi misaun banku nian, tuir rekomendasaun husi Governadór Banku Sentrál Timor-Leste, Helder Lopes.
“Kaebauk sei kontinua foka maka’as ba mikrokréditu, tanba ida-ne’e mak negósiu prinsipál no parte importante husi ami-nia misaun,” nia reforsa.
Kaebauk eziste ona tinan 25-resin, hahú husi 2001 nu’udar instituisaun mikrofinansa, no daudaun transforma ba banku komersiál. Atualmente opera iha kuaze iha munisípiu hotu ho sukursál 21, inklui sukursál sentrál iha Bebonuk, ho empregadu hamutuk 370.
Prezidente Repúblika apresia transformasaun Kaebauk nu’udar banku komersiál foun ne’ebé hahú ofisialmente iha 09 setembru 2026, no promete sei fó rekomendasaun hodi apoia dezenvolvimentu banku ne’e.
Jornalista : Hortêncio Sanchez
Editora : Julia Chatarina
