Jurista : “KSMJ iha kompeténsia halo transferénsia ba juíz maibé presiza haree antiguidade”
DILI, 30 Setembru 2026 (TATOLI)—Jurista Timoroan, Sergio Dias Quintas konsidera Konsellu Superiór Majistratura Judisiária (KSMJ) iha kompeténsia halo transferénsia ba juíz sira maibé presiza haree ba antiguidade.
“Juíz sira husi Tribunál ida bá Tribunál seluk ne’e kompeténsia tomak, la’ós iha KSMJ nia liman, maibé tuir regra bainhira atu deside halo transferénsia ida bá iha fatin seluk, tenke haree mós sira-nia antiguidade bainhira sira serbisu tinan barak nia laran iha Tribunál ida, bainhira KSMJ hakarak halo transferénsia ba nia, tenke husu mós nia aseitasaun ka nia disponibilidade foin maka bele halo transferénsia,” Jurista hateten ba Jornalista sira iha Tribunál Dili, Kaikoli, Kuarta ne’e.
Maski nune’e, Sergio Quintas husu ba juíz sira atu kumpre KSMJ nia desizaun ne’ebé daudaun delibera no deside hodi muda juíz na’in-haat husi Tribunál Dili ba fali Tribunál seluk.
“Tuir loloos juíz sira tenke kumpre prosesu administrativa, maski sira hato’o ona reklamasaun ba Konsellu, maibé ida-ne’e hein loron seluk kuandu kontestasaun ne’e afavór mak bele filafali mai iha sira-nia fatin,” nia akresenta.
Notísia relevante : Jurista Sergio Quintas husu KSMJ halo desizaun ho transparánsia
Jurista dehan, karik juíz balun hetan transférensia ba fatin sira seluk, se sira la aseita desizaun KSMJ, bele halo reklamasaun nune’e Konsellu sei haree reklamasaun hodi deside. Bainhira deside maka desizaun la favorese ba juíz sira, sira bele halo rekursu kontensiozu kontra desizaun Konsellu ba Tribunál no ikus mai Tribunál maka sei deside, serake desizaun ne’e tuir regra no normas ka lae.
Nia hatutan, desizaun ne’ebé KSMJ foti bele kumpre lai, maibé desizaun ne’e la’ós iha efeitu suspensivu, tenke kontinua la’o no juíz sira kumpre lai, iha reklamasaun maka diferente ho desizaun ne’e maka sira bele filafali mai serbisu iha fatin ne’ebé sira hakarak.
“Labele kaer desizaun KSMJ ne’e hanesan desizaun Estadu nian. Konsellu ne’e kompoin husi ema na’in-lima ne’ebé mai husi entidade Estadu ne’ebé tuur iha ne’ebá ne’e tenke haree mós ba ezijénsia juíz sira-nian tanba juíz hanesan mós reprezentante iha KSMJ. Sira ne’ebé mai husi entidade Estadu nian, sira-nia reprezentante iha ne’ebá hotu,” nia katak.
Sergio Quintas hateten, reklamasaun ne’e bele la’o, maibé labele impede Konsellu nia serbisu.
“Sira (juíz) bele halo reklamasaun maibé sira tenke kumpre desizaun KSMJ, atu desizaun ne’e la fundamenta mós sira tenke kumpre. Sira kolokadu ba munisípiu tenke bá tanba norma administrativu, depois ikus maka KSMJ deside deliberasaun ne’ebé sira deside la tuir norma sira bele filafali mai. Tanba ne’e, maski sira halo reklamasaun mós laiha efeitu suspensivu, katak atividade tenke la’o labele suspende,” nia reforsa.
Jornalista : Natalino Costa
Editora : Julia Chatarina
