Jurista Sergio Quintas husu KSMJ halo desizaun ho transparánsia
DILI, 30 Setembru 2026 (TATOLI)--Jurista Timoroan, Sergio Dias Quintas husu ba iha Konsellu Superiór Majistradu Judisiál (KSMJ) atu foti desizaun ho transparánsia.
“Ha’u-nia hanoin iha Konsellu Superiór Majistradu Judisiál ba oin ne’e, tenke foti desizaun onestu, transparánsia no kualidade, labele kahur ho interrese, se ida-ne’e kontinua nafatin, ita bele dehan katak setór justisa neste momentu hasoru obstákulu lubuk ida, atu halo nusa mak bele ultrapasa obstákulu ne’e filafali ona ba kredibilidade Konsellu ne’e rasik,” Jurista Sergio Quintas hateten ba Jornalista sira iha Tribunál Dili, Kaikoli, Kuarta ne’e.
Notísia relevante : Juíza Ana Paula deklara iha sala julgamentu lamenta ho desizaun KSMJ
Nia hatutan, karik KSMJ mantein nafatin hasai deliberasaun la bazeia ba norma no la bazeia ba transparánsia ne’e hatudu risku tebes ba setór justisa.
“Tanba ne’e koloka juíz sira tuir sira-nia antiguidade no tuir kapasidade intelektuál,” nia katak.
Jurista ne’e nota, iha populasaun barak mak buka justisa ne’ebé justu iha Tribunál Dili.
“Natureza kazu mós kompleksu tebes, tanba ne’e ita presiza bein kualifikadu atu koloka iha ne’e iha esperiénsia, ida-ne’e sai hanesan sasukat ida ba juíz sira seluk,” nia tenik.
Tuir Konstituisaun, iha artigu 128 (Konsellu Majistratura Judisiál nian) iha alínea 1 hateten, KSMJ nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juíz sira.
Iha alínea 2, haktuir Juíz Supremu Tribunál Justisa nian mak prezide KSMJ ne’ebé hola parte husi vogál sira tuirmai ne’e: a) Ida, Prezidente Repúblika mak hili, b) Ida, Parlamentu Nasionál mak hili, c) Ida, Governu mak hili, d) Ida, Majistradu Judisiál mak hili husi sira-nia leet.
Jornalista : Natalino Costa
Editora : Julia Chatarina
