Méxiku manán arbitrajen hasoru empreza kontadór estasionamentu EUA nian
DILI, 30 Setembru (TATOLI) — Méxiku manán kazu arbitrajen internasionál ida hafoin tribunál ida rejeita reklamasaun ne’ebé aprezenta hosi empreza kontadór estasionamentu norte-amerikanu ida no haruka atu selu liu dolar millaun ida iha kompensasaun ba despeza legál sira ne’ebé inkorre, fó-sai hosi Ministériu Ekonomia iha loron-tersa ne’e.
Doups Holdings LLC buka hela maizumenus peso millaun 600 (besik millaun US$33) iha kompensasaun hosi governu Méxiku hafoin nia konsesaun sira hodi instala no opera kontadór estasionamentu nian iha Sidade Méxiku—liuhosi empreza lokál ida—hetan revoga hosi Departamentu Mobilidade Sidade Méxiku nian.
Doups hatama ona nia reklamasaun ba Sentru Internasionál ba Rezolusaun Disputa Investimentu nian (ICSID, sigla inglés) tuir regra sira hosi Akordu Komérsiu Livre Norte-Amerikanu (NAFTA, sigla inglés), ne’ebé maka vigora iha momentu ne’ebá.
Tribunál ICSID deside katak nia laiha kompeténsia ba reklamasaun no rejeita kazu ne’e, hodi haruka empreza atu selu liu dolar amerikanu millaun $1 hodi kobre kustu legál no prosesuál sira Méxiku nian.
Tuir Ministériu Ekonomia, “husi inísiu arbitrajen nian, Méxiku defende katak reklamasaun ne’e sofre defisiénsia grave sira, liuliu kona-ba estruturasaun hosi empreza subsidiáriu ne’ebé alegadamente hetan estragu sira.”
Iha kestaun sira kona-ba Doups nia kontrolu ba subsidiáriu no kumprimentu ho prosedimentu sira arbitrajen nian, entre sira seluk, ministériu ne’e hatete.
ICSID, instituisaun ida hosi Grupu Banku Mundiál nian ne’ebé responsavel ba rezolve disputa internasionál sira entre investidór no estadu sira, fornese desizaun arbitrál no informasaun adisionál sira kona-ba prosesu sira.
Desizaun ne’e marka tan instánsia ida iha ne’ebé Méxiku uza ona mekanizmu legál internasionál sira hodi defende nia-an hasoru reklamasaun sira investidór nian ne’ebé hatama tuir tratadu sira protesaun investimentu nian.
Notísia relevante: Tribunál Victoria haruka Lighthouse selu millaun $1-resin ba TL
Fonte: Xinhua
