PDHJ simu keixa husi aplikante vaga membru PNTL foun
DILI, 30 Setembru 2026 (TATOLI)–Prevedoria Direitu Umanus no Justisa (PDHJ) simu keixa ne’ebé aprezenta husi aplikante ba vaga membru Polísia Nasionál Timor-Leste (PNTL) foun, ne’ebé foin daudaun hato’o sira-nia protestu iha Sentru Formsaun Polísia Komoro, hafoin Komisaun Rekrutamentu publika naran reteste.
Provedór Direitu Umanu no Justisa, Virgílio da Silva Guterres, informa, keixa ne’e hato’o husi aplikante sira ne’ebé uluk admitidu atu kontinua prosesu, maibé iha prosesu reverifikasaun foun sira la admitidu ho alegasaun katak dokumentu sira la hetan.
“Konteúdu husi keixa ne’e tanba sira uluk admitidu. Tama iha 12.000 admitidu atu ba tuir teste, maibé foin daudaun atu bá tuir teste foun ne’e sira la admitidu ho razaun tanba sira-nia dokumentus lakon. Ne’e horisehik sira hato’o keixa ona,” Provedór hato’o ba Jornalista sira iha nia knaar fatin, Praia dos Coqueiros, Kuarta ne’e.
Notísia relevante : Komandu PNTL prefere kouta pursentu 20 iha vaga rekrutamentu PNTL
Hafoin simu keixa husi kandidatu sira, PDHJ sei halo averiguasaun no verifikasaun atu determina loloos alegasaun sira ne’ebé aplikante hato’o.
Provedór dehan, Komisaun Rekrutamentu presiza klarifika kona-ba dokumentus ne’ebé lakon tanba kandidatu rasik la entrega ka entrega ona dokumentus maibé lakon iha prosesu administrativu.
“Se dokumentus lakon, kandidatu sira maka la hatama ka kandidatu sira hatama tiha ona, maibé Komisaun maka halo lakon. Se Komisaun Rekrutamentu maka halo lakon, sira tenke fó justifikasaun, labele dehan de’it lakon, tanba dokumentus entrega ba Polísia no Ministériu Interiór, sira tenke responsabiliza,” nia katak.
Nune’e, PDHJ sei verifika dokumentus no prosesu ne’e atu haree aplikante sira-nia alegasaun iha baze ka lae.
Tuir Provedór, iha kandidatu barak mak hakarak hato’o keixa maibé kandidatu 16 hamutuk ho sira-nia portavós mak submete keixa ba PDHJ.
Iha alegasaun deskreve, aplikante sira-nia dokumentus kompletu bainhira sira entrega, maibé iha prosesu foun sira la hetan dokumentus, ne’ebé situasaun ne’e akontese bainhira sira atu kontinua ba teste fíziku.
Virgílio Guterres reforsa, presiza konsidera prosesu rekrutamentu anteriór bazeia ba Tribunál Rekursu (TR) nia desizaun nune’e nu’udar referénsia iha prosesu rekrutamentu agora.
Nia rekomenda ba Komandu PNTL atu uza rekomendasaun no orientasaun husi prosesu anteriór nu’udar baze atu evita konfuzaun no problema hanesan ne’ebé mosu antes.
PDHJ mós rekomenda ba Komandu PNTL no Ministériu Interiór atu konsidera hadook ema sira ne’ebé uluk envolve iha prosesu rekrutamentu.
“Ema sira ne’ebé uluk envolve iha prosesu rekrutamentu di’ak liu lalika envolve tan iha prosesu ida agora ne’e. Tenke buka ema foun ne’ebé labele iha konflitu interrese,” Provedór sujere.
Tuir nia, medida ne’e importante atu garante prosesu rekrutamentu bazeia ba regra no regulamentu estabelesidu no iha tempu hanesan fó tratamentu hanesan ba aplikante hotu.
Jornalista : Natalino Costa
Editora : Julia Chatarina
