Tomás Cabral: STAE kontinua prepara prosesu resenseamentu biométriku
DILI, 30 Setembru 2026 (TATOLI)—Ministru Administrasaun Estatál (MAE), Tomás do Rosário Cabral, dehan Sekretatiadu Tékniku Administrasaun Eleitorál (STAE) kontinua prepara sistema no ekipamentu tékniku ba eleisaun, inklui prosesu resenseamentu biométriku.
Tuir nia katak resenseamentu biométriku ne’e importante atu atualiza dadus eleitór sira, liuliu ema ne’ebé muda hela fatin, ema ne’ebé mate ona, no dadus seluk ne’ebé presiza atualiza.
Nia hateten, STAE informa antes ne’e katak resenseamentu biométriku kontinua hala’o, ho objetivu atu aumenta persentajen eleitór sira-ne’ebé atualiza sira-nia kartaun antes eleisaun 2027.
Notísia relevante: Tomás Cabral: Probabilidade seidauk bele utiliza Kartaun Biométriku iha eleisaun
“Se ema ida la bá atualiza nia kartaun, lista eleitór sei la sai. Tanba ne’e, importante ba sidadaun sira atu halo atualizasaun,” nia dehan jornalista sira iha Palásiu Governu, Kuarta ne’e.
Ba timoroan sira ne’ebé hela ka servisu iha rai li’ur, Cabral hateten katak iha preparasaun atu fasilita resenseamentu no votasaun iha rai-li’ur, liuliu iha nasaun sira hanesan Indonézia no Austrália, liuhosi koordenasaun entre Ministériu Negósiu Estranjeiru (MNEK), STAE no embaixada/konsuladu sira.
Governu mós publika ona Dekretu Governu N.º 6/2026, kona-ba kalendáriu ba resenseamentu eleitorál iha rai-li’ur ba eleisaun prezidensiál 2027.
STAE sei halo sensibilizasaun
Kona-ba utilizasaun kartaun biométriku, STAE sei kontinua halo sensibilizasaun ba sidadaun sira liuhosi instituisaun públika, rádiu, televizaun no meiu sosiál.
“Objetivu mak atu informa sidadaun kona-ba períodu atualizasaun, fatin sentru resenseamentu no prosedimentu ne’ebé tenke halo,” Cabral esplika.
Lei eleitorál mós determina katak inskrisaun iha resenseamentu eleitorál mak kondisaun obrigatória atubele ejerse direitu votu.
Iha preparasaun ba eleisaun 2027, órgaun eleitorál sira sei kontinua halo preparasaun téknika, atualizasaun dadus eleitorál no edukasaun sívika, molok Prezidente Repúblika marka formalmente data eleisaun liuhosi dekretu.
Sei Marka liuhosi Dekretu Prezidensiál
Loron ba eleisaun prezidensiál 2027 sei determina liuhosi dekretu hosi Prezidente Repúblika, depoiz konsultasaun ho Governu no partidu polítiku sira ne’ebé iha assentu iha Parlamentu Nasionál.
Tuir Lei Eleitorál ba Prezidente Repúblika, Prezidente fiksa data eleisaun ho dekretu no ho antesedénsia mínimu loron 60. Se kandidatu ida la hetan liu metade hosi votu válidu iha votasaun dahuluk, segunda votasaun realiza iha loron 30 tuirmai.
Prezidente Repúblika, José Ramos-Horta, antes ne’e mós simu informasaun hosi Komisaun Nasionál Eleisaun (CNE) no Sekretariadu Tékniku Administrasaun Eleitorál (STAE) kona-ba preparasaun ba eleisaun prezidensiál 2027, inklui atualizasaun resenseamentu biométriku.
Iha enkontru ne’ebé Prezidente Horta hala’o ho Primeiru-Ministru, esplika katak, tuir planeamentu ne’ebé ko’alia ona, eleisaun dahuluk bele realiza iha Marsu 2027, no se presiza votasaun daruak, bele realiza iha Abríl 2027. Maibé, data ofisiál sei depende ba dekretu Prezidente Repúblika.
“Prezidente mak sei dekreta loron eleisaun. Prezidente husu katak iha Marsu sei iha eleisaun, no segunda votasaun iha Abríl,” Ministru Administrasaun Estatál, Tomás Cabral informa.
Nia hatutan katak mandatu Prezidente Repúblika atuál sei ramata iha 20 Maiu 2027, nune’e Prezidente Repúblika foun sei iha períodu atu prepara prosesu tranzisaun no entrega responsabilidade hosi Prezidente atuál ba Prezidente Repúblika foun.
Jornalista: Osória Marques
Editór: Xisto Freitas da Piedade
