Tribunál aplika Prizaun Preventiva ba arguidu CL suspeitadu ba krime droga
DILI, 30 Setembru 2026 (TATOLI)–Tribunál Judisiál Primeira Instánsia Dili (TJPD), Kuarta ne’e, aplika Prizaun Preventiva ba arguidu ho inisiál CL tanba iha indísiu forte ba krime droga.
Ekipa husi Polísia Sientífika Investigasaun Kriminál (PCIC, sigla portugés) iha Domingu (27/09) detein arguidu CL no GC, ne’ebé hanesan sidadaun Xina iha Manleuna no Bebonuk suspeitadu ba prátika konsumu droga.
Iha interrogatóriu dahuluk ohin, arguidu na’in-rua hili direitu ko’alia, nune’e interrogatóriu la’o hahú husi tuku 08:00 no termina iha tuku 19:00 kalan.
Iha prosesu judisiál ne’e, Ministériu Públiku (MP) ne’ebé reprezenta husi Prokuradór Matias Soares promove arguidu sira ho krime ilísitu droga ne’ebé previstu no punidu iha artigu 8, 9 no husi lei númeru 2/2017, 25 Dezembru.
Notísia relevante : Juíza Ana Paula rekoñse iha intervensaun liga ho kazu droga suspeitadu husi arguidu estranjeiru
Iha alegasaun, Prokuradór Matias Soares husu ba Tribunál atu aplika Prizaun Preventiva ba arguidu CL tanba durante prosesu Interrogatóriu Judisiál, arguidu konfesa faktus katak nia konsumu matéria droga ho tipu Anfetaminas no Metafetamina.
Iha parte seluk, MP husu ba Tribunál atu aplika Aprezentasaun Períodika no Proibisaun Auzénsia ba xineza feto ho inisiál GC.
Husi parte Defeza husu MP atu labele aplika medida koasaun Prizasaun Preventiva ba sidadaun mane ho inisiál CL no husu medida Aprezentasaun Períodika, enkuantu medida kausaun tuir Tribunál nia konviksaun.
Defeza husu Tribunál atu aplika medida koasaun Aprezentasaun Períodika no Proibisaun Auzénsia ba xineza ho inisiál GC.
Hafoin rona tiha parte hotu, Juíz Turnu José Maria liuhusi nia despaisu deside aplika Prizaun Preventiva ba arguidu CL, enkuantu arguida GC aplika medida koasaun Aprezentasaun Períodika no Proibisaun Auzénsia.
Hatán ba despaisu ne’e, Defeza husi arguidu sira, Advogadu Privadu Octávio Cardoso, hateten, nia parte lakonkorda ho Tribunál nia desizaun no sei halo rekursu ba Tribunál Rekursu hodi kontesta desizaun ba nia kliente CL.
Nia dehan, Tribunál konsidera iha deklarasaun arguidu na’in-rua hateten iha Primeiru Interrogatóriu katak iha arguidu mane ne’e mak forte indísiu envolve iha krime ne’ebé mak MP promove.
“Prosesu ne’e simples, uma ves que ha’u repete laiha provas ne’ebé mak sufisiente deklara katak sira na’in-rua hanesan ema ne’ebé mak distribui ou sai hanesan sira rua-nia benefísiu ba atividade refere tanba iha buat balun ne’ebé defeza dúvida ho despaisu no nafatin mantein nia posizaun katak laiha buat ne’ebé mak halo razaun justisa tenke rekorre ba direitu arguidu. Ha’u rekorre,” nia tenik.
Advogadu Privadu iha semana ida-ne’e sei rekorre rekursu ba Tribunál Rekursu hodi kontesta desizaun Tribunál Primeira Instánsia nian.
Jornalista : Natalino Costa
Editora : Julia Chatarina
