Aplikante ida husi vaga Juíz ba Supremu Tribunál Justisa rezigna-an
DILI, 01 Outubru 2026 (TATOLI)—Aplikante ida husi vaga Juíz ba Supremu Tribunál Justisa (STJ) rezigna-an tanba kondisaun saúde la permite.
Membru Komisaun Rekrutamentu no Selesaun Juíz ba STJ no Tribunál Rekursu (TR), Carmelita Caetano Moniz, haktuir, Komisaun iha loron 18 Setembru simu aplikante 33 tama bá sala ezame Sentru Formasaun Jurídika Judisiária hodi tuir ezame, maibé iha minutu 10 bainhira ezame la’o, iha aplikante ida sente la konfortável tanba kondisaun saúde ladi’ak, nune’e momentu ne’ebá kedan nia husik fatin ezame no hakat bá li’ur ho akompañamentu husi médiku no protokolu sira.
“Entaun, kandidata ne’e sai no nia hato’o deklarasaun rezignasaun la tuir teste eskrita atu konkorre ba juíz Konselleiru iha Supremu Tribunál Justisa,” Carmelita informa ba jornalista sira liuhusi konferénsia imprensa ne’ebé hala’o iha edifísiu STJ, Kolmera, Kinta ne’e.
Notísia relevante : Aplikante 33 ba vaga Juíz STJ submete ba teste eskrita
Ho nune’e, aplikante ba teste eskrita vaga Supremu Tribunál Justisa seluk kontinua prosesu.
“Iha primeira dia, iha momentu ne’ebé kandidatu ba teste ba Tribunál Supremu mak hamutuk 32, ne’e ba Tribunál Supremu,” nia akresenta.
Iha fatin hanesan, membru Komisaun Rekrutamentu no Selesaun Juíz ba STJ no TR, José Pedro Camões, hateten, tanba aplikante ne’e rasik la kontinua ezame, nia lakon oportunidade ba kargu ida iha STJ.
“Más nia nafatin iha direitu konkorre vaga Juíz ba Tribunál Rekursu, konfirma ona nia nafatin konkorre,” nia akresenta.
José Camões dehan, hafoin juri sira halo teste eskrita ba aplikante vaga Juíz ba STJ no TR, daudaun halo ona verifikasaun ba aplikante sira-nia rezultadu ezame.
Tuir regulamentu, juri sira sei iha prazu loron-15 atu halo korresaun no publika aplikante sira-nia naran ne’ebé liu ba faze entrevista. Aplikante sira mós tuir regulamentu ne’ebé iha, sira ne’ebé mak la konkorda ho desizaun juri iha prazu loron-10 nia laran, bele hato’o reklamasaun.
Jornalista : Natalino Costa
Editora : Julia Chatarina
