Juíz Dezembargadór na’in-haat iha TR hato’o pedidu ba Komisaun Rekrutamentu

DILI, 01 Outubru 2026 (TATOLI)—Juíz Dezembargadór na’in-haat iha Tribunál Rekursu (TR) hato’o pedidu ba Komisaun Rekrutamentu no Selesaun ba Juíz Supremu Tribunál Justisa (STJ) no TR, katak baihira sira laliu iha vaga STJ, sira  bele fila bá sira-nia serbisu fatin orijin.

Juíz Dezembargadór sira ne’ebé hato’o pedidu ba Komisaun mak hanesan Juíz Deolindo dos Santos, Juíz Duarte Tilman, Juiza Jacinta Correira no Juíza Natercia Gusmão.

“Tuir Lei Organizasaun Judisiária ne’e koalia klaru, bainhira Komisaun fó sai avizu ba konkursu Juíz Dezembargadór sira, atuál Tribunál Rekrusu deklara katak sira aseita, maibé bainhira la pasa iha vaga ba Supremu Tribunál, sira nafatin halo knaar iha Tribunál Rekursu,” Prezidente Komisaun Rekutamentu no Selesaun ba Juíz STJ no TR, Avelino Coelho informa ba jornalista sira liuhusi konferénsia imprensa ne’ebé hala’o iha edifísiu STJ, Kolmera, Kinta ne’e.

Notísia relevante : Aplikante 33 ba vaga Juíz STJ submete ba teste eskrita

Tuir Lei Organizasaun Judisiária, juíz sira iha TR prosede hodi tuir vaga ne’e tenke halo deklarasaun.

“Buat sira ne’e iha enkuadramentu legál depois sira tuir ba Supremu Tribunál Justisa karik sira laliu, sira-nia fatin nafatin iha Tribunál Rekursu nomós ba juíz sira seluk ne’ebé mak tuir mak laliu, sira nafatin ba ninian instánsia ne’ebé mai hanesan juíz sira, mai husi Tribunál Primeira Instánsia no Tribunal Rekursu sira bele filafali bá sira-nia fatin serbisu antes ne’e la’ós problema, ne’e iha baze legál, ne’e la’ós katak ita maka fasilita malu ka ema fasilita ema balun, ne’e lei mak hateten hanesan ne’e,” nia katak.

Jornalista     : Natalino Costa

Editora          : Julia Chatarina