Komisária Carmelita Moniz garante KSMJ sei halo nomeasaun ba Juíz STJ ho imparsiál

DILI, 01 Outubru 2026 (TATOLI)–Komisária Komisaun Rekrutamentu no Selesaun ba Juíz Supremu Tribunál Justisa (STJ) no Tribunál Rekursu (TR), Carmelita Caetano Moniz garante katak Konsellu Superiór Majistratura Judisiária (KSMJ) sei halo nomeasaun ba Juíz sira ne’ebé tuur iha STJ ho imparsiál no laiha konflitu interrese.

“Ema hotu ko’alia kona-ba transparánsia, hotuhotu ezije kona-ba transparánsia, kualker rezultadu publika, rezultadu juri sira ida ba sira-nia an hanesan ida fali ba tau iha Sentru Formsaun Jurídiku Judisiária ne’ebé ema hotu bele asesu kandidatu ne’ebé mak pasa ka aptu ou kandidatu ida-ne’ebé mak la pasa ka la aptu ne’e ita bolu transparánsia mak ne’e ona, públiku iha asesu ba faze hotu,” Carmelita hateten ba Jornalista sira liuhusi konferénsia imprensa ne’ebé hala’o iha edifísiu STJ, Kolmera, Kinta ne’e.

Notísia relevante : Jurista : “KSMJ iha kompeténsia halo transferénsia ba juíz maibé presiza haree antiguidade”

Carmelita esplika, nomeasaun husi KSMJ ba Juíz STJ no TR ne’e bazeia ba klasifikasaun juri.

“Pur ezemplu Juíz no Juíza sira tuir ne’e primeira klasifikasaun sé mak segundu klasifikadu to’o klasifikadu ikus liu,” nia akresenta.

Nia dehan, ba Prokuradór Repúblika ka Ministériu Públiku sira na’in-tolu mak tuir, husi na’in-tolu ne’e sei hetan klasifikasaun.

“Ba fali jurista rekoñesidu méritu ne’e mós na’in-haat mak konkorre ne’e nafatin mós juri sira tau iha ne’ebá jurista rekoñesidu primeira kualifikada, segundu no terseiru to’o kuartu. Entaun, ikus liu Konsellu sira nomea juíz na’in-haat. Jurista rekoñesidu méritu na’in-ida, Prokuradór Repúblika na’in-rua, se karik Prokuradór Repúblika na’in-tolu mak la liu, entaun Prokuradór Repúblika na’in-rua ne’e ba prienxe jurista méritu ne’ebé mak nia valór di’ak,” nia katak.

Carmelita hateten, karik ba jurista rekoñesidu méritu na’in-haat ne’e mak la pasa, entaun jurista rekoñesidu méritu rua ne’e ba hotu Prokuradór Repúblika tanba sira nia valór di’ak.

“Juíz karreira ka lae, tuir lei tenke na’in-haat, rua ne’e mak tenke fahe,” nia tenik.

Jornalista     : Natalino Costa

Editora          : Julia Chatarina