KSDS ko’alia kona-ba situasaun seguransa nasionál, Xanana: Situasaun la’o di’ak hela
DILI, 01 Outubru 2026 (TATOLI)–Konsellu Superiór Defeza no Seguransa (KSDS) hala’o reuniaun hodi ko’alia kona-ba situasaun seguransa nasionál.
Primeiru-Ministru, Kay Rala Xanana Gusmão, hateten ba jornalista sira, hafoin ramata enkontru iha Palásiu Prezidensiál Bairru Pité, Kinta ne’e.
“Reuniaun Konsellu Superiór Defeza no Seguransa, mai ko’alia kona-ba seguransa nasaun nian oinsá, iha asuntu oioin, hanesan krime tráfiku ema, droga ne’ebé membru hotu ko’alia,” Xanana hateten.
Xefe Governu ne’e hatutan, iha tinan nia rohan, KSDS sei hala’o enkontru dala-ida tan hodi informa ba Prezidente Repúblika kona-ba situasaun seguransa.
“Iha tinan nia ikus ami sei enkontru dala-ida tan hodi informa ba Prezidente kona-ba situasaun sira, maibé agora situasaun la’o di’ak hela, instituisaun hotu-hotu hala’o serbisu ho di’ak, iha ne’e iha Polísia Sientífika Investigasaun Kriminál (PSIK), Servisu Nasionál Intelijénsia Estratéjiku (SNIE), Polísia Nasionál Timor-Leste (PNTL), no FALINTIL-Forsa Defeza Timor-Leste (F-FDTL),” nia akresenta.
Notísia relevante : SNIE-SMTL selebra kontratu fortalese kooperasaun servisu iha área seguransa nasionál
Xanana dehan, iha asuntu balu ne’ebé labele fó sai ba públiku, maibé nia hato’o apresiasaun ba instituisaun seguransa no defeza sira ne’ebé serbisu ho di’ak.
“Iha asuntu balun ne’ebé ha’u labele atu fó sai iha ne’e, maibé ha’u temi de’it iha apresiasaun ba instituisaun seguransa ne’ebé serbisu di’ak hela. Maibé buat sira ita nafatin hadi’a nafatin atu situasaun kontinua la’o di’ak, liuliu seguransa Timor nian,” nia tenik.
Jornalista : Hortêncio Sanchez
Editora : Julia Chatarina
