Absénsia FRETILIN iha Eleisaun Prezidensiál: Teste ba Xanana nia Arte Polítika
Hosi: Sancho F. Xavier
Alumni Universidade Dili (UNDIL) 2011
Iha Eleisaun Prezidensiál ba tinan 2027, Timor-Leste sei haree buat ida neꞌebé dahuluk akontese. Partidu boot daruak partidu Frente Revolucionária de Timor-Leste Independente (FRETILIN) liuhosi reuniaun Comité Central da Fretilin (CCF) iha loron 29 Agostu 2026, deside la aprezenta nia kandidatu rasik iha Eleisaun Prezidensiál. Absénsia FRETILIN nian provoka pergunta oinoin iha analizadór politiku sira nia hanoin. Partidu figura istóriku hanesan FRETILIN tanbá sá derepente la partisipa iha Eleisaun Prezidensiál? Seraké ida-neꞌe nuꞌudar estratejia husi rezultadu avaliasaun durante liu dékada rua FRETILIN nia partisipasaun iha eleisaun demokrátiku Estadu nian? Iha sorin seluk, duvida boot dirije ba FRETILIN nia adversáriu polítika, partikularmente ba Kay Rala Xanana Gusmão nia resposta ba FRETILIN nia absénsia ne’e. Saida mak Xanana sei halo bainhira FRETILIN lakohi hasoru malu direta iha Eleisaun Prezidensiál?
Ita koko hateke fila ba kotuk uitoan, iha istória polítika Timor-Leste nian sempre haleꞌu ho figura rua. Husi sikun ida, FRETILIN ho nia estrutura neꞌebé forte tebes husi nasionál toꞌo suku, no husi sikun seluk mak figura Xanana ho nia karizma neꞌebé forte no influnsiadu. Bainhira figura rua-neꞌe hasoru malu iha batalla polítika halo rai tomak sente. Ida-neꞌe laꞌos deꞌit kona-ba rivalidade ida neꞌebé makaꞌas entre figura rua maibé, sira muda ona iha períodu hirak eleisaun liubá kotuk. Eleisaun nu’udar festa demokrasia ida neꞌebé reuni nostaljia memória jerasaun tuan no jerasaun foun hodi hateke ba oin ho naruk no luan liu ba futuru Timor-Leste nian. Liuliu bainhira iha interasaun entre Xanana Gusmão Prezidente Partidu Kongresu Nasionál Rekonstrusaun Timor-Leste (CNRT) ho Partidu FRETILIN nia Sekretáriu-Jerál Mari Alkatiri, iha dinámika neꞌebé úniku no furak tebes. Sira-nia prezensa iha Eleisaun Prezidensiál iha nia kmanek ketak. Tanba iha neꞌebá povu laꞌos deꞌit haree nostalijia no memória luta rezisténsia nasionál, neꞌebé sei haburas fila-fali ba estabilidade, pás hodi fó dalan ba dezenvolvimentu neꞌebé pró ba povu ki’ik sira.
Maske nuneꞌe, iha estratéjia 2026 muda. Nune’e ita presiza analiza uza óklu polítika loos. Tuir teoria hanorin katak polítika neꞌe nuꞌudar arte ida. Haree ba FRETILIN muda nia pozisaun husi partisipasaun ativu ba absénsia iha Eleisaun Prezidensiál 2027 nuꞌudar estratejia ida. Klaru katak neꞌe kalkulasaun polítika ida ne’ebé kleꞌan. Iha neꞌebé ita bele nota katak neꞌe bazeia ba dilema interna ho vizaun polítika partidu nian. FRETILIN haree katak eleisaun Parlamentár mak objetivu neꞌebé loos tanba determinasaun ba kaer Governu no orsamentu. Iha FRETILIN nia dezisaun atu la aprezenta kandidatura ita bele nota razaun oin rua:
1). Razaun dahuluk mak dilema interna. FRETILIN seidauk hetan figura neꞌebé bele troka Saudozo Francisco Guterres Lú Olo ba kargu Prezidente Partidu nian. Ida neꞌe mós ita bele dehan katak FRETILIN tenke pauza iha Eleisaun Prezidensiál nuꞌudar símbolu respeitu no onra ba Saudozu Lú Olo durante nia prosesu lutu. Tuir teoria “Institusionalizasaun Partidaria”, partidu ida neꞌebé la konsege halo tranzisaun lideransa ho diꞌak sei selu kustu iha eleisaun. Nuneꞌe, absénsia iha eleisaun prezidensiál mak forma atu “akompania de’it eleisaun” maibé konsentra tomak ba konsolidasaun interna, hodi asegura vitória ba eleisaun parlamentár nian.
2). Razaun daruak mak reposizionamentu polítika. FRETILIN hanoin atu muda husi kandidatu ba árbitru. Ne’e nuꞌudar jogu polítiku nian. Maibé iha laran FRETILIN rasik mosu tan dilema ida: karik tenke apoia kandidatu Prezidente Repúblika, sé mak tenke apoia? Apoia Lere Anan Timur signifika aliña ho jerasaun tuan, símbolu respeitu no rekoñesementu sakrifísiu luta nian no konsolidasaun seguransa. Kualkér dezisaun sei iha konsekuénsia ba unidade interna no imajen públiku partidu nian.
Dilema ida-neꞌe mós dudu ba Xanana atu hanoin. Nia iha dalan tolu: Dahuluk, apoia Lere Anan Timur atu aliña ho jerasaun libertasaun. Daruak, apoia Rui Maria Araújo atu aliña ho governasaun no kontinuidade téknika. Datoluk, Xanana iha opsaun seluk mak lansa kandidatu rasik neꞌebé prepara ona. Opsaun datoluk ne’e bele iha rasaun neꞌebé forte liu, tanba nia lakohi tama iha senariu neꞌebé FRETILIN prepara ba nia, ho razaun balu neꞌebé iha katak desde eleisaun antesipada liubá, Xanana hili dalan nonok atu hapara konfrontu ho FRETILIN.
Ho kandidatu rasik, nia mantém autonomia totál. Liu tan mak Xanana nia kalkulasaun sempre hateke dook no luan liu. Timor-Leste nia ajenda nasional ba Xanana mak, prodús Greater Sunrise iha Timor-Leste, fronteira definitivu rai-ketan no tasi, no mós prepara Timor-Leste iha ASEAN ho kualidade. Ida-neꞌe prezisa Prezidente ida neꞌebé iha vizaun aliña ho ajenda nasionál ba tinan 10 mai. Figura intelektuál no kapasidade diplomasia mundiál laꞌos preferénsia definitivu ba Xanana. Husi istória Prezidente Repúblika sira liubá neꞌebé Xanana fo apoiu, Xanana nia preferénsia mak kona-ba lealidade no asegura vizaun Estadu Xanana nian ba Timor-Leste ida neꞌebé prósperu liu, mak manán bensaun.
Husi sikun seluk, FRETILIN nia absénsia la signifika vitória ba Xanana livre ona. Maibe iha kontráriu aumenta nia responsabilidade. Xanana obrigadu tenki hili no asume responsabilidade ba rezultadu Eleisaun Prezidensiál. Sai hanesan teste ba nia lejitimidade no ba vizaun Estadu nian.
Ikus liu, dezisaun FRETILIN absénsia iha Eleisaun Prezidensiál hamosu mudansa foun iha arte Polítika Timor-Leste nian. Ne’e sinál katak dominasaun arte polítika jerasaun tuan sira, ofisialmente atu hotu ona. Pájina foun sei tuir mai ho oportunidade murak neꞌebé kebit jerasaun foun hamriik konstrói nia futuru ho vizaun Estadu. Liuhosi Eleisaun Prezidensiál mak meiu refere atu aplika hodi kontinua estafeta depois jornada jerasaun tuan nian termina.
