ASEAN Cooperative Expo 2026 nu’udar oportunidade importante halibur reprezentante kooperativa
DILI, 02 Outubru 2026 (TATOLI)—Timor-Leste ofisialmente loke ASEAN Cooperative Expo 2026 ka Espozisaun Kooperativa ASEAN 2026 ho tema “Empowering Community, Connecting Nation” ka Hametin Komunidade, Konektadu Nasaun, Sesta ne’e, iha Sentru Konvensaun Dili (CCD, sigla portugés).
Espozisaun ne’e organiza husi Sekretaria Estadu Kooperativa (SEKoop) durante loron-tolu nia laran, hahú 02 to’o 04 Outubru, ho objetivu Timor-Leste hanesan membru foun ASEAN, hakarak promove integrasaun ekonomika rejionál no hametin kooperativa hanesan dalan ba dezenvolvimentu inkluzivu no sustentável.
Iha biban ne’e, Ministru Komérsiu no Indústria, Nino Pereira ne’ebé reprezenta Vise Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, konsidera atividade ne’e sai nu’udar oportunidade importante atu halibur hamutuk reprezentante kooperativa, emprezáriu no parte interesada sira.
“Prezensa nasaun membru ASEAN sira iha espozisaun ne’e importante tanba sai nu’udar meiu ida atu promove no fahe produtu, kultura no inovasaun, nomós kria oportunidade ba emprezáriu no kooperativa sira atu hasoru-malu, troka esperiénsia no buka oportunidade negósiu no merkadu foun,” Ministru Nino hateten iha nia diskursu.
Notísia relevante : Konferénsia Kooperativa Rejionál iha Dili: “Hakbiit komunidade, liga nasaun sira”
Tuir nia, espozisaun ne’e atu promove produtu kooperativa, fahe esperiénsia no hametin oportunidade kooperasaun, nune’e mós fasilita asesu ba merkadu iha nível nasionál no rejionál.
Eventu ne’e partisipa husi reprezentante nasaun membru ASEAN, hamutuk ho emprezáriu no grupu Mikro, Pekena no Média Empreza (MPME) sira.
Espozisaun ne’e mós sai plataforma ida atu hametin relasaun no kooperasaun ekonómika entre Timor-Leste no nasaun membru ASEAN sira, liuliu iha área kooperativa, komérsiu, MPME no dezenvolvimentu merkadu rejionál.
Liuhusi eventu ne’e, kada nasaun bele hatudu produtu no potensiál lokál sira, enkuantu Timor-Leste mós bele promove produtu nasionál no buka oportunidade atu liga produtór no emprezáriu lokál ho merkadu ASEAN.
Aleinde ne’e, espozisaun ne’e nu’udar oportunidade istorika atu hatudu progresu kooperativa Timor ba ASEAN, eforsa kompromisu ho vizaun ASEAN 2045 inklui promove integrasaun ekonómika liuhusi kooperativa.
Kooperativa ASEAN sei aprezenta produtu husi membru ASEAN sira iha barraka 10, Kooperativa Timor-Leste sei aprezenta produtu lokál husi kada munisípiu iha barraka sia, Kooperativa husi MPME iha barraka sia inklui kooperativa rua husi Nusa Tenggara Timur (NTT) – Indonézia sei aprezenta mós sira-nia produtu.
Atividade ne’e partisipa husi partisipante 200, kompostu husi 150 husi nasionál no 50 husi delegasaun ASEAN.
Jornalista : Hortêncio Sanchez
Editora : Julia Chatarina
