Bolseiru na’in-50 promete estuda ho responsabilidade no dedikasaun iha Portugal
DÍLI, 02 Outubru 2026 (TATOLI) — Bolseiru timoroan na’in-50 ne’ebé sei ba halo estudu no formasaun iha área justisa, iha Portugal, ohin, despe Primeiru-Ministru Kay Rala Xanana Gusmão.
Iha enkontru despedida ne’ebé hala’o iha Palásiu Governu, Primeiru-Ministru Xanana Gusmão hateten katak desizaun atu fó bolsa estudu ne’e mai hosi Governu, enkuantu prosesu seleksaun hala’o liuhosi teste ne’ebé organiza hosi grupu koordenadór sira.
Tuir nia, oportunidade ne’e sei determina husi estudante sira rasik liuhosi sira-nia esforsu no dezisaun, ne’ebé sei influensia sira-nia futuru.
“Ohin parte hotu ko’alia kona-ba imi-nia kompromisu, responsabilidade, tanba ne’e imi hotu tenke prepara-an, nune’e imi bele sai ema ne’ebé prontu atu servisu ba imi-nia povu”, Primeiru-Ministru hato’o iha Palásiu Governu.
Xefe Governu espera katak bolseiru ida-idak merese atu ba hasai kursu iha maibé nia husu atu “la haluha liafuan ida katak ‘Ita husik Timor, maibé ita lori Timor iha ita-nia fuan no iha ita-nia neon.”
“Liafuan ne’e signifika katak loroloron imi tenke hanoin katak imi iha ne’ebá ho objetivu atu fila mai ho kapasidade no koñesimentu ne’ebé liután, atu bele servisu ba ita-nia povu”, Xanana husu.
Iha enkontru ne’e, reprezentante estudante bolseira, Nenia Milenia Belo da Silva, hato’o agradecimentu ba Governu tanba fó oportunidade ba sira atu kontinua estudu iha Portugál.
Nia hateten katak bolseiru sira mai hosi família simples no durante tempu naruk iha mehi atu hetan oportunidade hanesan ne’e, no agora mehi ne’e sai realidade.
“Tanba ne’e, ami agradese ba fiar ne’ebé imi tau ba ida-idak hosi ami no esperansa ne’ebé imi tau ba ami-nia future,” Nenia dehan. “Ami komprende importánsia hosi bolsa estudu ida-ne’e no rekoñese investimentu boot ne’ebé Governu Timor-Leste halo ba formasaun hosi estudante ida-idak ne’ebé prezente iha ne’e.”
Nia hateten katak bolsa estudu ne’e la’ós de’it apoiu finanseiru atu realiza estudu, maibé mós reprezenta investimentu ba futuru nasaun no ba harii setór justisa ne’ebé forte no iha profisionál ho kualifikasaun di’ak liután.
Tuir nia, formasaun ne’e sei kontribui ba preparasaun juís, prokuradór, advogadu no tékniku jurídiku sira iha futuru, atu sira prontu atu servisu ba Timor-Leste no nia povu.
“Ami, bolseiru na’in-50, hakarak deklara ba públiku ami-nia kompromisu ba oportunidade ida-ne’e no ba ita-nia nasaun. Ami kompromete atu estuda ho responsabilidade, dedikasaun no disiplina, hodi aproveita ho máximu oportunidade ne’ebé fó ona ba ami”, nia kompromete.
Enkuantu ne’e, Ministru Planeamentu no Investimentu Estratéjiku, Gastão Sousa, hateten katak setór justisa mak área estratéjika ida no ita Estadu tenke halo investimentu ba iha área ida-ne’e.
Governante ne’e hatutan katak bainhira estudante sira fila fali mai Timor-Leste, sira sei iha responsabilidade atu reforsa setór justisa.
“Imi tenke estuda, estuda no estuda tán, atu bele fila fali mai no dezenvolve instituisaun sira hotu iha ne’e, hodi bele fó servisu di’ak liután ba ita-nia povu no ita-nia pátria”, nia rekomenda.
Jornalista: Alexandra da Costa
Editór: Filomeno Martins
