Empreza cor ona Ponte Uelolo, loron 28 liu tiha bele utiliza ona
VIKEKE, 02 Outubru 2026 (TATOLI)–Kompañia konstrutura hahú cor Ponte Uelolo, iha Aldeia Uma-Boot, Suku Luka, Postu Vikeke Vila, Munisípiu Vikeke. Obra ne’e responsabiliza husi Empreza Nananiu Engineering & Construction Company, Unipessoal.
“Ami haree traballadór sira cor ona ponte ne’e. Maibé, moru protesaun sira mak seidauk ne’ebé agora daudaun traballadór sira kontinua servisu,” Xefe Aldeia Uma-Boot, Suku Luka, Jeremias Marques ba TATOLI, iha Postu Vikeke Vila, Sesta ne’e.
Notísia relevante: https://tatoli.tl/2026/01/06/autoridade-luka-solisita-mop-orienta-empreza-aselera-konstrusaun-ponte-uelolo/
Jermias hatutan cor ona maibé seidauk bele utiliza ba movimentasaun tanba sei ateru no konstrui tan ezgotu iha mota ninin sira hafoin bele uza.
“Durante ne’e movimentasaun komunidade nian liuhusi mota laran. Nune’e, tempu udan difikulta tebes movimentu sira no tenke hein mota tun hotu mak bele hakat-liu bá mota sorin,” nia esplika.
Hafoin konstrusaun ne’e, Jeremias hateten, komunidade na’in-2.455 resin husi uma-kain 31 iha área Aldeia Uma-Boot ne’e bele halo movimentasaun bá-mai lori produtu agríkola ba merkadu, ka asesu bá eskola no sentru saúde sira.
Iha fatin ketak, Koordenadór Infraestutura Ministériu Obra Públika (MOP) Munisípiu Vikeke, Mário Ângelo Menezes, haktuir katak antes cor ponte ne’e, ekipa husi MOP no Ajénsia Dezenvolvimentu Nasionál (ADN) halo uluk teste laboratóriu hodi verifika no asegura katak materiál konstrusaun kumpre padraun téknika no espesifikasaun ne’ebé determina ona iha kontratu.
“Nune’e, kona-ba cor parte ponte leten hotu ona no liu tiha loron 28 foin bele utiliza. Depoiz ita sei kompleta tan lai estrutura seluk hodi liga ba ponte foin ita bele utiliza. Tan ne’e, agora daudaun ita-nia empreza esforsu hela atu kompleta item sira-ne’e,” nia subliña.
Entretantu, projetu Ponte Uelolo implementa husi Kompañia Nananiu Engineering & Construction, Unipessoal, Lda, bazeia ba Kontratu Nú. SSS/118/MOP-2025, ho montante kontratu hamutuk $4.398.863,24.
Bazeia ba informasaun husi terrenu, projetu ne’e agora daudaun atinje ona progresu fíziku 26,27%.
Jornalista: Vitorino Lopes da Costa
Editór: Xisto Freitas da Piedade
