Kandidatu 11.391 membru PNTL sei tuir teste iha loron 08 Outubru

DILI, 02 Outubru 2026 (TATOLI)—Kandidatu hamutuk 11.391 membru Polísia Nasionál Timor-Leste (PNTL) foun sei tuir teste iha edifísiu Komisaun Funsaun Públika (KFP) iha loron 08 Outubru, tuku 08:00 to’o 18:30.

“Sira ne’ebé maka liu iha reverifikasaun dokumentu iha 11.391, dokumentu ne’ebé mak kompletu no tuir rekezitu legál. Reklamasaun iha reverifikasaun dokumentu 1.456 mak la priense dokumentu,” Prezidente Komisaun Juri ba Rekrutamentu Membru PNTL 2026, Komisáriu Asistente Polísia José Soares, informa ba jornalista sira liuhusi konferénsia imprensa ne’ebé halo iha Kuartél Jerál PNTL, Kaikoli, Sesta ne’e.

Kandidatu sira sei tuir teste iha munisípiu idaidak, Aileu mak sei uluk no tuir kedan Ainaru, ne’ebé teste ne’e sei hala’o durante loron-11 konta mós ho loron Sábadu.

Komisáriu relata, ba kandidatu ne’ebé laliu tanba bainhira Komisaun haree sira-nia dokumentu hodi konfirma komprimentu ba rekezitu, iha kandidatu balun mak aprezenta diploma legalizadu maibé iha balun aprezenta la’ós legalizadu, sira aprezenta kopia no balun aprezenta dokumentu scan, nune’e tuir Dekretu-Lei 35/2026 la admite no Komisaun anula kandidatu sira ne’e husi lista.

Notísia relevante : Ohin, tempu ba kandidatu PNTL halo reklamasaun ramata

José Soares subliña, iha prosesu reverikasaun ba kandidatu sira-nia dokumentu, Komisaun deteta kandidatu ida hanesan sidadaun estranjeiru hakarak konkorre iha vaga ida-ne’e, nune’e deside anula husi lista.

“Iha rekezitu kona-ba ida-ne’e la temi ita atu apoiu, maibé ita hakruuk de’it ba lei ne’e mak ha’u-nia kolega internasionál sira halo, ida-ne’e ita hotu kumpre lei nasionál no prátika internasionál,” nia akresenta.

Prezidente Komisaun hateten, ba kandidatu sira ne’ebé mak atu tuir prova kulturál tenke mai antes, lori kartaun ne’ebé Komisaun sira fó, lori lapizeira, no ókulu, enkuantu pasta no sasán seluk la autoriza hodi tama iha fatin ezame. Durasaun ba ezame minutu 90 no pergunta hamutuk 80.

“Iha tempu ezame nia laran sira labele bá haris fatin, tenke fokus, labele fila oin ba sira-nia kolega iha oin, kotuk, sorin loos ka sorin karuk tanba pergunta sei la hanesan. Telefone ita sei foti no sei hatama iha gaveta ou iha armáriu ne’ebé mak iha Komisaun Funsaun Públika,” nia hato’o.

Matéria ezame ne’e mak lian tetum, portugés, istória, jeografia, matemátika inklui Konstituisaun RDTL.

Kandidatu 189 hato’o reklamasaun

Iha sorin seluk, durante ne’e Komisaun no Juri ba Rekrutamentu membru PNTL foun 2026 simu reklamasaun husi kandidatu hamutuk 189. Husi reklamasaun sira ne’e, kandidatu balun la satisfáz ho rezultadu reverifikasaun dokumentu ne’ebé foin lalais fó sai ba públiku.

“Iha reklamasaun iha reverifikasaun dokumentu husi kandidatu hamutuk 1.456 mak la priense rekezitu, sira ne’ebé mak halo reklamasaun hamutuk 189, iha na’in-tolu ba hato’o reklamasaun husi karta eskrita ba Komandante Jerál no sira seluk halo abaixu asinadu,” Prezidente Komisaun haktuir ba Jornalista sira liuhusi konferénsia impresa ne’ebé hala’o iha Kuartél Jerál PNTL, Kaikoli, Sesta ne’e.

Nia dehan, Komisaun sei la konsidera reklmate sira ne’ebé halo reklamasaun ho abaixu asinadu. Tanba tuir Diploma Ministeriál la temi reklamasaun koletivu, maibé reklamasaun ho indivíduu.

“Iha reklamasaun dokumentu iha inísiu fó oportunidade ba indivíduu idaidak mak hatama nia dokumentu atu halo selesaun to’o ikus mai iha reklamasaun abaixu asinadu, ami kumpre de’it ba Diploma Ministeriál, katak atu simu ba indivíduu idaidak ne’e iha direitu tuir lei nomós artigu ida fó biban ba Komisaun katak indivíduu ne’ebé la priense rekezitu ne’e hasai husi lista,” nia tenik.

Komisaun fó tempu loron-lima ba kandidatu sira atu hato’o reklamasaun. Parte seluk, konfirmasaun dokumentu ho sistema eletrónika.

“Ita hatama sira-nia dokumentu ba sistema, kuandu idade la to’o sistema fó hatene kedan, kuandu idade liu sistema fó hateten katak ne’e idade liu, dokumentu la kompletu ita halo reverifikasaun fízika haree ida pur ida mak ita hatama ba sistema deteta,” nia katak.

Juri lori kandidatu sira ne’ebé la admite iha faze selesaun hodi bá haree sistema nune’e bele konfirma rasik sira-nia dokumentu iha sistema.

“Sira bá haree, sira hatene katak ne’e dokumentu la kompletu no depois ita kruza malu ho fízika ne’ebé mak hatama, ita foti idaidak nian hodi sira haree rasik dehan lae dokumentu ida-ne’e legaliza maibé fotokopia, ida-ne’e legaliza maibé scan,” Komisáriu haktuir.

Jornalista     : Natalino Costa

Editora          : Julia Chatarina