Ministru Nino Pereira asina nota entendimentu ho Lijuramosxdaily dezenvolve indústria masin
DILI, 02 Outubru 2026 (TATOLI)–Ministru Komérsiu no Indústria, Nino Pereira, foin lalais ne’e, asina nota entendimentu ho empreza Lijuramosxdaily Unipesoál, Lda hodi dezenvolve indústria masin iha Timor-Leste.
Ministru Nino Pereira fó apresiasaun ba empreza Lijuramosxdaily Unipesoál Lda ne’ebé hatudu vontade no kooperasaun ho Ministériu Komérsiu no Indústria (MKI) no hatudu kapasidade iha setór privadu timoroan atu kontribui ba dezenvolvimentu indústria nasionál.
“Governu sei nafatin akompaña no apoia inisiativa ne’e, hanesan parte husi esforsu atu promove setór privadu ne’ebé forte no aproveita potensiál ekonomia Timor-Leste nian,” Ministru hateten hafoin asina nota kooperasaun iha Gabinete MKI, Bebora.
Notísia relevante : MCI klarifika: Projetu sentru produsaun masin iha Oekusi ‘la’ós’ abandonadu
Memorandu entendimentu ne’e estabelese parseria ne’ebé Governu fó apoiu no setór privadu lidera hodi dezenvolve indústria masin integradu ne’ebé bazeia ba produsaun doméstika, hasa’e valór adisionál no esportasaun.
Objetivu husi projetu ne’e mak atu hamenus dependénsia importasaun masin mai Timor-Leste, liuhusi produsaun masin timoroan ne’ebé kompetitivu no kumpre kualidade internasionál.
Inisiativa ne’e kontribui ba hasa’e esportasaun masin no produtu masin timoroan, hametin seguransa fornesimentu ba ai-han, fó dinamika ba setór indústria, no kria empregu hamutuk ho rendimentu iha munisípiu partisipante sira.
Asinatura nota entendimentu ne’e marka pasu importante ba MKI hodi implementa polítika industrializasaun no valorizasaun produtu lokál no iha te,pu hanesan bele fó insentivu ba empreza nasionál sira atu kompete iha merkadu internu no internasionál.
Jornalista : Hortêncio Sanchez
Editora : Julia Chatarina
