Prezidente no Komisáriu CNE foun simu pose hodi hahú mandatu 2026–2031
DILI, 02 Outubru 2026 (TATOLI) – Prezidente Parlamentu Nasionál, Maria Fernanda Lay, fó pose ba Prezidente no membru Komisáriu Komisaun Nasionál Eleisaun (CNE, sigla portugés) ba mandatu 2026–2031.
Kompozisaun foun CNE hamutuk ema na’in-hitu, ne’ebé kompostu husi reprezentante Parlamentu Nasionál, José Agostinho da Costa Belo, Odete Maria Belo no Leonardo Amaral; reprezentante Prezidente Repúblika, Teresa Maria Noronha Cardoso, husi Ministériu Públiku Pedro Baptista Aleixo dos Santos, reprezentante Governu, Elviro Fernandes Moniz, no reprezentante majistratura judisiál, Patrícia Fátima Barreto Magno Xavier.
Maria Fernanda Lay parabeniza Prezidente CNE ho membru emposadu sira ne’ebé foin hili husi órgaun sira tuir dispozisaun legál.
Nia hatete katak komisáriu sira ne’e hili ba mandatu foun nu’udar órgaun kolejiál deliberativu ne’ebé iha responsabilidade atu halo supervizaun ba resenseamentu no aktu eleitorál.
Tuir nia, atuasaun órgaun administrasaun eleitorál determina husi prinsípiu boa governasaun no kondisaun prosesu eleitorál, ne’ebé konsekuentemente sei influensia kredibilidade instituisaun demokrátika, tuir kompeténsia ne’ebé lei haruka.
Nia realsa katak rekomendasaun sira husi observadór internasionál iha eleisaun anteriór sei sai hanesan referénsia atu país hadi’a prosesu eleitorál iha eleisaun sira tuirmai.
“Internasionalmente, Timor-Leste rekoñesidu ita-nia eleisaun demokrátika no pasífika iha pasadu. Ho esperansa katak, eleisaun tuirmai sai di’ak liután ho kompeténsia ne’ebé ita fó ona ba órgaun ne’ebé ohin fó ona tomada pose”, nia hatete iha Parlamentu Nasionál, ohin.
Ho tomada pose ne’e, CNE hahú ona mandatu foun no sei hasoru responsabilidade boot iha preparasaun ba eleisaun sira tuirmai.
Prezidente CNE, José Agostinho Belo, agradese ba konfiansa ne’ebé Parlamentu fó no kompromete atu hala’o knaar ho responsabilidade. “Ohin onra boot ba CNE, prosesu ida naruk no husi serbisu ne’ebé komisaun hala’o, maibé hetan apresiasaun husi órgaun importante Parlamentu Nasionál, Prezidente Repúblika, Governu no sosiedade tomak”, nia dehan.
Nia hatete katak rezultadu husi serbisu CNE nian kontribui ba progresu Timor-Leste iha prosesu demokrátiku, liuliu iha relasaaun ho Asosiasaun Nasaun Sudeste Aziátiku (ASEAN, silga inglés) no Komunidade País Ko’alia Lia-Portugés (CPLP).
José Agostinho komprometidu atu hala’o knaat ho imparsialidade no dedikasaun, tuir juramentu ne’ebé halo, no uza esperiénsia ne’ebé iha hodi serbisu hamutuk ho parte hotu.
Nia hatete katak CNE sei kontinua prepara no konsolida instituisaun hodi realiza Eleisaun Prezidensiál iha 2027, Eleisaun Podér Lokál no Eleisaun Parlamentár, hodi hametin demokrasia iha país.
Notísia relevante: José Belo reeleitu ba Prezidente CNE
Jornalista: Nelson de Sousa
Editora: Maria Auxiliadora
