Masin Laga bá merkadu internasionál, Governu apresia emprezáriu Timoroan
DILI, 03 Outubru 2026 (TATOLI) – Governu, liuhusi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hamutuk ho Ministru Komérsiu no Indústria, Nino Pereira, lansa esportasaun masin, ho produsaun iha Postu Administrativu Laga, Munisípiu Baukau, produtu timoroan ba merkadu internasionál.
Vise-Primeiru-Ministru Francisco Kalbuadi Lay sente onra tebes nu’udar timoroan, no lori Governu nia naran hamutuk ho Ministru Komérsiu no Indústria kongratula empreza-na’in no família tanba konsege esplora indústria ki’ik ida-ne’e.
“Hein katak ho indústria ki’ik bele sai boot liután,” Francisco Kalbuadi Lay hateten.
Autoridade Governantiva ne’e informa, empreza ne’e la’ós foin primeira-vez halo esportasaun, tanba antes ne’e halo ona ba produtu barak hahú husi Seamos, no fiar katak sei sai indústria boot iha futuru.
“Nia la’ós primeira-vez, nia halo importasaun buat barak ona hahú husi Seamos, fiar katak ita-boot sei sai indústria ida boot iha futuru, ohin ita haruka tan masin kontentór ida ba li’ur, ida-ne’e orgullu ida, ha’u hasoru ministru lubuk ida husi Indonézia nian sira gava loos ita-boot nia produtu,” Governante ne’e haktuir.
“Ami sente kontente tanba iha timoroan ida-ne’ebé mak iha inisiativa furak tebes ho nia kapasidade rasik ho nia vizaun nu’udar emprezáriu, prodús masin ne’e iha Laga agora ita lori ona ba mundu,” nia énfaze.
Notísia relevante:Ministru Nino Pereira asina nota entendimentu ho Lijuramosxdaily dezenvolve indústria masin
Enkuantu, Ministru Komérsiu no Indústria, Nino Pereira orgullu ba inisiativa emprezáriu timoroan ne’ebé haree katak nasaun ne’e iha duni potensialidade ba masin.
“Ita orgullu ba inisiativa emprezáriu timoroan, ida-ne’ebé haree ona katak ita-nia nasaun ida-ne’e iha duni potensialidade ba masin, ida-ne’e iha benefísiu ekonómiku ne’ebé boot tanba ita bele prodús iha rai-laran ho kuantidade ne’ebé aumenta ho nune’e mak Governu esforsu hodi fó apoiu la’ós ohin de’it hahú kedan husi Governu da-haat, Governu da-lima, Governu da-neen agora iha Governu da-sia ita kontinua fali,” Nino Pereira hateten.
Produsaun rai-laran sa’e, redús importasaun
Ministru ne’e hateten, “Ida-ne’e demonstra katak iha seriedade tantu Governu no setór privadu. Ohin masin ne’ebé prodús iha Timor halo ona esportasaun ba liur, bainhira produsaun iha rai-laran sa’e ita sei redús importasaun masin husi rai liur”.
Ezekutivu ne’e hatutan, indústria ne’e kria mós kampu servisu ba timoroan liu 500, no númeru ne’e sei aumenta tan bainhira produsaun sa’e.
Prodús iha Laga no sei espande
Diretór Emoreza Lijuramosxdaily Unipesoal Lda, Ussy Amaral da Silva, hateten, masin sira ne’e prodús iha Laga no agora atu esporta ba nasaun barak.
“Masin sira ne’e ami prodús iha Laga agora ami atu esporta ba li’ur ba nasaun barak, merkadu ita hetan ona. Ha’u halo promosaun boot ba rai-li’ur, produtu ne’e atu esporta ba Austrália, Nova Zelándia, Indonézia, Singapura, Estadu Unidu Amérika no Kanadá, ba oin ami sei aumenta nasaun barak liután,” emprezáriu timoroan ne’e kompromete.
Nia informa, iha fulan ne’e sei esporta uluk tonelada 300 ba nasaun sira ne’e, no tinan oin sei esporta to’o tonelada 10.000 ba rai-li’ur, ho presu merkadu internasionál ba produtu tolu kilograma 10 ho folin dolar amerikanu 70.
“Agora ami foin prodús iha Laga, ba oin ami atu espande ba Ulmera Likisá, espande ba Atabae, Maubara, Oekusi no Manatutu,” nia konklui.
Jornalista: Hortêncio Sanchez
Editór: Rafael Ximenes de A. Belo
