Époka Foun, Liga Timorense Ajusta Kalendáriu Tuir FIFA

DILI, 04 Outubru 2026 (TATOLI) – Órgaun Liga Futebol Timor-Leste (LFTL), hamutuk ho Federasaun Futebol Timor-Leste (FFTL) no Governu liuhusi Ministériu Juventude, Desportu, Arte no Kultura (MJDAK), sei ajusta kalendáriu Liga Timorense ba époka foun atu tuir kalendáriu Federasaun Internasionál Futebol Asosiasaun (FIFA).

Ba époka foun, LFTL hamutuk ho Governu no Federasaun planeia atu halo ajustamentu ba kalendáriu kompetisaun hodi aliña ho kalendáriu FIFA.

Mudansa ne’e konsidera importante tanba iha époka sira liubá, Liga Timorense hahú iha períodu diferente ho kompetisaun iha rai seluk, ne’ebé bele afeta mós kalendáriu Seleksaun Nasionál nian.

Prezidente LFTL, Ipólito Soares, hatete ba TATOLI Domingu ne’e iha Kampung Alor Dili katak, époka ida-ne’e, primeira volta planeia atu hahú iha finál fulan Outubru no remata iha Dezembru.

“Ba époka ida-ne’e, primeira volta planeia atu hahú iha finál fulan Outubru no remata iha Dezembru. Depois, segunda volta sei kontinua iha Janeiru 2027 to’o kompetisaun remata,” Ipólito Soares hateten.

Nia hatutan, janela transferénsia ba époka foun hahú ona iha 01 Outubru no sei taka iha 15 Outubru.

“Janela transferénsia ba époka foun hahú ona iha 1 Outubru no sei taka iha 15 Outubru. Durante períodu ne’e, klubu sira bele halo rejistu no transferénsia jogadór antes Primeira Divizaun hahú,” nia dehan.

Ajustamentu kalendáriu ne’e ho objetivu atu asegura kompetisaun nasionál la’o tuir padraun internasionál no fasilita preparasaun jogadór sira ba kompetisaun nasionál no internasionál.

Jornalista: Hortêncio Sanchez

Editór: Rafael Ximenes de A. Belo