Loron 09 Outubru, Tailándia prezide serimónia ofisiál simu Primeiru-Ministru Xanana Gusmão
DILI, 04 Outubru 2026 (TATOLI) – Primeiru Ministru Tailándia Anutin Charnvirakul, sei prezide serimónia ofisiál simu Primeiru Ministru Timor-Leste nian, Kay Rala Xanana Gusmão, iha loron 09 fulan-Outubru hafoin kontinua ba enkontru bilaterál entre rai rua.
Nota imprensa ne’ebé Ajénsia TATOLI asesa husi Ministériu Negósiu Estranjeiru, Reinu Tailándia nian, katak, Kay Rala Xanana Gusmão, nu’udar Primeiru-Ministru Repúblika Demokrátika Timor-Leste, sei hala’o vizita ofisiál ba Tailándia nu’udar bainaka governu nian, tuir konvite husi Anutin Charnvirakul, Primeiru-Ministru, iha loron 9 no 10 Outubru 2026.
Iha nota imprensa ne’e fó-sai katak, vizita ne’e sei sai hanesan vizita ofisiál dahuluk ba Tailándia hosi Primeiru-Ministru ida hosi Timor-Leste iha tinan sanulu-resin-tolu nia laran — dezde 2013 no dahuluk dezde Timor-Leste sai nu’udar membru ASEAN ba dala sanulu-resin-ida iha Outubru 2025.
Vizita ne’e sei tau baze ba selebrasaun sira ne’ebé marka aniversáriu ba dala-25 hosi estabelesimentu relasaun diplomátika entre nasaun rua ne’e iha tinan 2027.
Iha loron-sesta, loron 9 fulan-outubru tinan 2026, Primeiru-Ministru sei prezide serimónia ofisiál benvindu ba Primeiru-Ministru Timor-Leste ho nia komitiva iha Uma Governu, tuir fali ho enkontru bilaterál.
Tuir mai, Primeiru-Ministru na’in-rua ne’e sei sai sasin ba troka akordu no hala’o konferénsia imprensa konjunta. Hafoin ne’e, Primeiru-Ministru sei sai uma-na’in ba almosu ofisiál hodi fó onra ba Primeiru-Ministru Timor-Leste nian.
Diskusaun sira sei kobre tópiku oioin ne’ebé iha interese mútuo, hanesan kooperasaun dezenvolvimentu; kooperasaun defeza no seguransa, inklui kombate krime transnasionál; komérsiu, investimentu, no seguransa ai-han; enerjia no turizmu; konetividade ema-ba-ema; nune’e mós kooperasaun iha kuadru ASEAN nia laran.
Tailándia no Timor-Leste mantein relasaun besik dezde Tailándia nia partisipasaun iha operasaun manutensaun pás nian iha Timor-Leste iha tinan 1999, no Tailándia tama iha grupu nasaun dahuluk ne’ebé estabelese relasaun diplomátika ho Timor-Leste.
Tailándia mós apoia ona Timor-Leste nia dezenvolvimentu sósiu-ekonómiku iha área sira ne’ebé hatán ba nesesidade komunidade lokál sira-nian.
Ho konvite ne’e, Primeiru Ministru (PM), Kay Rala Xanana Gusmão, ohin dezloka ba Tailándia no delega Sérgio de Jesus Fernandes da Costa Hornai atuál Ministru Justisa asume primeiru-ministru interinu hahú husi loron 04 to’o 11 Outubru.
Notísia relevante: PM Xanana vizita Tailándia no delega Sérgio Hornai asume primeiru-ministru interinu
TATOLI
