Komunidade Ritabou husu instalasaun iluminasaun públika iha estrada
BOBONARU, 05 Outubru 2026 (TATOLI) – Komunidade iha Suku Ritabou, Postu Administrativu Maliana, Munisípiu Bobonaru, preokupa ho projetu intalasaun ba iluminasaun públika solar-PV estrada ne’ebé seidauk kobre parte balun iha área ne’e, maski estrada sira balun foin konstrui.
Xefe Suku Ritabou, Maximiano dos santo Araújo, hatete katak parte estrada husi área kampu aviasaun bá natar Odomau ho diresaun bá Taman Makam Pahlawan no husi sentru saúde bá Diruaben ne’e kompañia kee ona rai-ku’ak, maibé instalasaun lampu seidauk realiza.
“Ami la hatene tanba saida mak ami-nia tun mai ne’e seidauk monta, projetu ne’e mak seidauk hotu ka oinsá, tanba Maliana laran ahi lakan hotu ona”, nia dehan ba Tatoli tersa-feira ne’e.
Maximiano esplika katak situasaun ne’e halo komunidade preokupa tanba estrada foun sira presiza iluminasaun atu garante seguransa no fasilita movimentu komunidade durante kalan.
“Estrada ne’e mós foun hotu, nia pakote ida hotu husi kruzamentu bá to’o kolejiu ne’e ahi lakan tiha ona. Agora, tun bá ami-nia la lakan fali, kolejiu ida sa’e bá ai-laran ne’e ahi lakan fali, sira ‘hanoin ami ne’e la ema ne’ebé tau deit iha ne’ebá”, nia lamenta.
Komunidade Domingos Afonso mós husu ba Governu atu haree fali distribuisaun iluminasaun iha suku Ritabou, atu populasaun iha área ne’e mós bele hetan asesu.
“Ami sente Governu halo diskriminasaun, tanba sá mak estrada foun hotu maibé ami-nia lampu la monta fali, ema iha Maliana laran tomak lampu jalan lakan naroman hotu, ami iha Ritabou ne’e nafatin, rai-ku’ak ida kompañia kee hela ne’e atu halo saida, nusa mak la monta fali ne’e. Governu tenke haree ida-ne’e, tanba ami mós iha direitu hansan ho sira seluk para hetan naroman”, nia dehan.
Diretór empreza Mapihl Unipessoal Lda., Francisco da Cruz, esklarese katak projetu ne’e finaliza ona 100%. “Ritabou ho parte seluk iha planu ba implementasaun segunda faze nia”, nia esplika.
Sistema iluminasaun públika solar-PV ne’e kompañia instala ho totál unidade 879, ne’ebé kobre Maliana Vila inklui área balun iha Balibó.
Obra ne’e implementa ho objetivu atu fó naroman ba estrada no hadi’a seguransa, konfortu, no asetu estétiku iha área urbana Maliana no Balibó.
Notísia relevante: Iluminasaun públika iha Maliana aumenta atividade iha tempu kalan
Jornalista: Sergio da Cruz
Editora: Maria Auxiliadora
