Iluminasaun públika iha Maliana aumenta atividade iha tempu kalan
BOBONARU, 09 Setembru 2026 (TATOLI) – Komunidade iha Maliana, munisípiu Bobonaru, apresia ho instalasaun lampu iluminasaun públika iha dalan no bairru sira, ne’ebé lori naroman no permite komunidade kontinua halo atividade durante kalan.
Rosa de Jesus Lopes, rezidente iha Maliana dehan katak iluminasaun ne’e halo mudansa ba sidade, tanba populasaun hein tinan 20-resin ona atu hetan naroman iha tempu kalan.
Nia hatutan katak kombinasaun entre estrada ne’ebé di’ak ho iluminasaun halo ambiente sidade Maliana sai seguru no nabilan liu, liuliu iha kalan.
“Ami kontente ho iluminasaun ida-ne’e, tanba lori naroman tebes mai ami povu Maliana. Ami la senti ona hanesan kalan, tanba lampu lakan tomak iha bairru-bairru. Ami hein ona buat ida ne’e liu tinan 20-resin. Ohin Maliana sai sidade ida ne’ebé nabilan”, Rosa Lopes dehan ba Tatoli, ohin.
Aleinde ne’e, Alberto Maia Marques, membru komunidade Maliana mós kontente ho mudansa ne’e. Nia dehan katak, durante semana ida nia laran, depoizde kompañia ramata instalasaun ba iluminasaun ne’e, populasaun komesa sente diferensa iha sidade.
“Kuandu tuku 18:00 lampu sira lakan, hotu-hotu sai bá li’ur no halimar, tanba kontente haree Maliana sai ona sidade lolos. Kompara ho uluk, tuku 20:00 ba leten ema la la’o bá-mai tanba nakukun. Agora, dalan sira nabilan hotu, ita la’o ba mai la sente hanesan tempu kalan, tanba hetan de’it mak naroman ne’e”, nia hatete.
Alberto konsidera iluminasaun rua ne’e nu’udar parte ida husi dezenvolvimentu sidade, tanba naroman permite komunidade utiliza espasu públiku no halo atividade iha kalan.
Motorista Rodolfo Tavares dehan iluminasaun dalan halo kondisaun ba movimentu iha kalan sai fásil no seguru liu.
Notísia Relevante: Komunidade presiza kuida iluminasaun iha kapitál Maliana
Rodolfo konsidera mudansa ne’e nu’udar indikadór ida katak dezenvolvimentu la’o la’ós de’it iha loron, maibé mós bele sente iha kalan liuhusi infraestrutura públika ne’ebé di’ak no apoia atividade komunidade.
“Agora diferente tebes ho tinan barak ba kotuk. Iha kalan, ami bele la’o bá-mai no la ta’uk ona tanba nakukun laiha. Dalan sira ita haree naroman hotu to’o bairru-bairru”, nia dehan.
Nia hatutan katak, ho sidade ne’ebé nabilan iha kalan, motorista sira bele kontinua halo atividade no buka pasajeiru iha oras kalan. “Baibain ne’e, kalan ema atu ojek tama bairru-bairru sira dook ne’e ami ta’uk no la bá ida, más agora naroman ami bele buka osan di’ak, la’o bá-mai livre”, nia salienta.
Sistema iluminasaun públika solár-PV ne’e kompañia Maphil Unipessoal Lda., instala ho totál unidade 879, ne’ebé kobre Maliana Vila, inklui área balun iha Balibó.
Obra ne’e implementa ho objetivu atu fó naroman ba estrada no garante seguransa, konfortu, no aspetu estétiku iha área urbana Maliana no Balibó.
Notísia relevante: Instalasaun poste iluminasaun solar 897 fó nabilan ba sidade Balibó no Maliana iha Setembru
Jornalista: Sergio da Cruz
Editora: Maria Auxiliadora
