Mari Alkatiri: Estabelesimentu Supremu Tribunál Justisa tenke transparante
DILI, 05 Outubru 2026 (TATOLI)–Antigu Primeiru-Ministru, Mari Alkatiri husu ba entidade Estadu iha prosesu estabelesimentu Supremu Tribunál Justisa (STJ) tenke ho transparante no labele partidariza iha rekrutamentu, nune’e instituisaun bele iha kredibilidade iha públiku nia matan.
Nia dehan, prosesu estabelesimentu hahú la’o maibé hahú mosu dúvida tanba iha rekrutamentu juíz sira ne’ebé tuur iha STJ la la’o transparante.
“Aktu Estadu ne’e aktu polítiku, mas partidarizadu buat ida, politizadu buat seluk. Tenke iha polítika, ó hakarak saida ó nia polítiku hateke bá oin ne’e hakarak saida ne’e polítiku ida. Agora ó halo persegisaun ba partidu ne’e partidarizadu,” Mari Alkatiri hateten ba Jornalista sira hafoin hasoru malu ho Antigu Xefe United Nation Mission in East Timor (UNAMET), Ian Martin iha nia Rezidénsia Eis Titulár, Farol, Segunda ne’e.
Notísia relevante : FRETILIN preokupa ho membru KSMJ balun kandidata ba vaga juis STJ
Mari Alkatiri dehan, tenke halo buat ida kredível ka ema bele tau fiar, hahú didi’ak iha dalan loos para bele to’o ba fatin ida-ne’ebé loos,” nia akresenta.
Antigu Primeiru Ministru ne’e nota prosesu sira iha estabelesimentu STJ desde hahú la la’o tuir prosedimentu legál, liliu liga ba nomeasaun Prezidente Tribunál Rekrusu.
“Buat ne’e prosesu la’o daudaun, ha’u la hatene prosesu la’o to’o ne’ebé? Ha’u dehan de’it katak hahú sala tiha ona, sala tanba ema ida atu hahú prosesu ne’e nia rasik nia laiha baze legál tan,” nia katak.
Tanba ne’e FRETILIN hatama ona keixa taka tiha gaveta. Maski nune’e, instituisaun sira hanesan Tribunál Rekursu ne’e mak husi Primeiru Governu ne’ebé nia mak lidera.
“Ha’u mak harii duni institusaun sira ne’e hotu, ha’u mak harii nu’udar Primeiru-Ministru hamutuk ho Prezidente Tribunál Rekursu, Cláudio Ximenes,” nia subliña.
Jornalista : Natalino Costa
Editora : Julia Chatarina
