Advogadu husi Juíz nain-haat hato’o rekursu kontensioza hasoru desizaun KSMJ
DILI, 06 Outubru 2026 (TATOLI)–Advogadu husi Juíz na’in-haat ne’ebé hetan transferénsia bá Tribunál seluk hato’o rekursu kontensioza hasoru desizaun Konsellu Superiór Majistratura Judisiária (KSMJ) tanba konsidera katak desizaun ne’e laiha razaun fundamentu.
Juíz na’in-haat mak hanesan Juíza Ana Paula Fonseca, Juíza Francisca Cabral, Juíz António Fonseca no Juíz José Gonçalve, ne’ebé antes ne’e hala’o knaar Tribunál Judisiál Primeira Instánsia Dili (TJPID) maibé ho desizaun atu transfere bá Tribunál Oekusi, Suai no Baukau
Ho nune’e, majistradu Judisiál na’in-haat ne’e liuhusi sira-nia Advogadu Justisa Sosiál (Ju’S) ne’ebé fó asisténsia ba sira hato’o ona rekursu kontensioza hodi kontesta desizaun.
Notísia relevante : Juíz Antonino Gonçalves konsidera desizaun KSMJ ba juíz na’in-haat ne’e nulu
Advogadu husi Ju’S, Olívio Barros, hateten, nia reprezenta juíz na’in-haat neʼebé kontesta KSMJ nia deliberasaun kona-ba sira-nia transferénsia.
“Ami husu atu poder kolokasaun juíz sira tenke ezerse tuir lei, ho respeitu ba inamobibilidade, audiénsia prévia, fundamentasaun sira no regra movimentu judisiál,” Olívio Barros hateten ba Jornalista sira liuhusi konferénsia imprensa ne’ebé halo iha edifísiu Ju’S, Motael, Tersa ne’e.
Nia dehan, hafoin konsellu halo tiha deliberasaun hodi muda Juíz na’in-haat, husi Ju’S ne’ebé mak fó asisténsia ba majistradu judisiál na’in-haat ne’e submete reklamasaun kedan iha loron 21 Setembru.
“Juíz sira simu notifikasaun iha loron 29 Setembru. Iha 01 Outubru, ami reitera reklamasaun no interpoin rekursu kontensiozu ba Tribunál Rekursu, ho pedidu urjente suspensaun efikásia,” nia akresenta.
Advogdu Privadu Olívio Barros esplika, prazu ba Tribunál Rekrusu atu haree rekursu kontensioza ne’e mak iha loron-15.
“Ami husu revogasaun transferénsia, subsidiáriamente, adia ezekusaun to’o konkursu ba Supremu Tribunál Justisa no Tribunál Rekursu ramata. Se transferénsia mantein, ami husu data ho antesedénsia mínimu loron 30 no rejime tranzisaun,” nia katak.
Olívio Barros haktuir, iha gaabinete juíz na’in-haat iha prosesu pendente 746 no prosesu kriminál 592.
“Deliberasaun la fixa data ba produsaun efeitu, juíz sira kontinua serbisu,” nia tenik.
Jornalista : Natalino Costa
Editora : Julia Chatarina
