ETV São João Paulo II iha Pássabe presiza komputadór atu reforsa ezame dijitál
OEKUSI, 06 Outubru 2026 (TATOLI) – Eskola Tékniku Vokasionál (ETV) São João Paulo II, iha sub-rejiaun Pássabe Rejiaun Administrativa Espesiál Oekusi Ambeno (RAEOA), presiza komputadór unidade 15 atu apoia ba prosesu aprendizajen tanba eskola referida aplika ezame ho sistema dijitál.
Batista Lafo nu’udar manorin-na’in iha ETV São João Paulo II Pássabe, hato’o nia rekomendasaun ne’e perante sensibilizasaun literásia utilizasaun mídia sosiál iha atividade Mídia Tour ne’ebé organiza husi Uniaun Profisaun Jornalista Timor-Leste (UPJTL), hala’o iha salaun ETV Pássabe, ohin.
“Durante ne’e ami hala’o ezame iha eskola uza sistema dijitál ne’ebé ami instala ona, fasilidade sira-ne’ebé ami prepara maka komputadór no aumenta ho estudante sira-nia telemovél rasik, no laptop ne’ebé estudante iha, ne’ebé fasilidade sira-ne’e atu apoia estudante ba ezame dijitál la to’o, ami presiza tan 15 hanesan ne’e bele sufisiénte ona, tanba komputadór iha de’it unidade 33 kompara ho númeru estudante liu to’o kedas na’in-133,” nia hateten iha sorumutu ho ekipa UPJTL.
Nia informa, fasilidade komputadór sira-ne’e, eskola mak fornese rasik no hetan mós apoia unidade 10 husi Sekretáriu Estadu Ensinu Sekundáriu Jerál no Tékniku Vokasionál, maibé nafatin la sufisiénte ba estudante sira.
Kona-ba prosesu ezame, nia dehan, uza de’it of-line liuhusi aplikasaun SAM suporta ba pakote internet nian, ne’ebé la presiza ense pulsa, tanba garantia liuhusi tipeline haat ne’ebé monta ona iha klase idak-idak.
“Ami iha departementu rua, informátika no agronómia, atividade rua ne’e iha eskola hala’o hotu, ne’ebé ba ezame ho sistema dijitál ami hala’o kleur ona dezde eskola ne’e hamrik iha 2021,” nia hateten.
Notísia relevante:Sekretáriu Estadu ME konsidera ETV Pássabe sai referénsia aplika aprendizajen ho dijitál
Rekorde fali katak, iha loron 08 fulan-Jullu 2026 ne’e, Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, hala’o ona vizita hodi observa prosesu letiva no konsisdera Eskola Tékniku Vokasionál (ETV) São João Paulu II, sai referénsia ba aplikasaun sistema dijitál iha prosesu aprendizajen.
Governante ne’e, hato’o nia sentimentu ksolok, bainhira oferese fasilidade téknolojía hanesan komputadór unidade neen no mákina emprisora ida, atu reforsa prosesu aprendizajén ba eskola referida.
Governante ne’e afirma, apoia ne’e bazeia enkuadramentu polítika edukasaun nian, tanba apoiu ne’ebé hato’o husi Ministériu Edukasaun la’ós de’it asaun pontuál, maibé bazeia mós ba kbiit legál, diplomas nasionál, no planu estratéjiku sira ne’ebé vigora iha Repúblika Demokrátika Timor-Leste:
Konstituisaun RDTL (Artigu 59): Garante direitu fundamental ba edukasaun no rekoñese knaar Estadu nian hodi promove modernizasaun sistema ensinu nian, nune’e mós asegura sidadaun hotu nia asesibilidade ba teknolojia.
Lei Baze Edukasaun (Lei No. 14/2008): Sura katak Estadu tenke providensia kbiit, kualidade, no meius didátiku-pedagójiku neʼebé adekvadu ba dezenvolvimentu siénsia no teknolojia iha eskola sira iha territóriu nasionál.
Planu Estratéjiku Dezenvolvimentu Nasionál (PEDN 2011-2030): Define katak modernizasaun infraestrutura ho Teknolojia Informasaun no Komunikasaun (TIK/ICT) sai pilar fundamentál hodi prepara foin-sa’e sira ba merkadu traballu sékulu XXI nian.
Notísia relevante:
Jornalista: Abílio Elo Nini
Editór: Rafael Ximenes de A. Belo
