PNDS iha Suku Vemasse Tasi sei iha faze finalizasaun
BAUKAU, 06 Outubru 2026 (TATOLI)—Atividade regulár Programa Nasionál Dezenvolvimentu Suku (PNDS) iha Suku Vemasse Tasi, Postu Administrativu Vemasse, atuál sei iha faze finalizasaun.
Xefe Suku Vemasse Tasi, Carlos Freitas, esplika Suku Vemasse Tasi tinan-ne’e implementa PNDS hamutuk atividade tolu hanesan regulár ida no adisionál rua iha-ne’ebé tuir planu sei finaliza iha finde tinan-ne’e ho totál orsamentu hamutuk rihun $76.
“Ami suku agradese ho PNDS tanba bele rezolve problema komunidade iha suku. Ida-ne’e mak osan povu nian,” Carlos Freitas hateten iha ninia kna’ar fatin, Vemasse Tasi, Tersa ne’e.
Lider suku ne’e relata atividade regulár implementa reabilita estrada iha Aldeia Orlalan ho metru 565 ne’ebé hela metru 30 tanba sei hein orsamentu hodi finaliza ho totál orsamentu hamutuk rihun $34.
Aleinde ne’e, atividade adisionál implementa koziña merenda eskolár iha Eskola Bázika Sentrál Binagari, iha Aldeia Orlalan ne’ebé iha faze finalizasaun ho totál orsamentu hamutuk rihun $30, enkuantu atividade adisionál seluk konstrui sentru komunidade iha Aldeia Uailakama, Suku Raha ho totál orsamentu hamutuk rihun $12.
“Benefisiu direta ba komunidade tanba durante ne’e la’o iha tahu maibé agora kondisaun di’ak ona,” Carlos Freitas akresenta.
Entretantu, Suku Vemasse Tasi rasik hamutuk aldeia haat kompostu Betulale, Lor, Orlalan no Raha ho totál populasaun hamutuk 4.204 husi uma-kain hamutuk 1.024.
Jornalista: Natalino Belo
Editór: Xisto Freitas da Piedade
