Progresu reabilitasaun estrada rurál pakote ualu iha Bobonaru atinje 25%
BOBONARU, 06 Outubru 2026 (TATOLI)-Progresu fíziku projetu reabilitasaun estrada rurál pakote ualu iha munisípiu Bobonaru daudaun ne’e atinje ona 25% hafoin kompañia lokál sira implementa iha Abríl liubá.
Koordenadór Infrestrutura Ministériu Obra Públika iha Munisípiu Bobonaru, Fernando de Fátima, dehan katak implementasauan Projetu FRC (Fiber Reinforced Concrete) ne’e fahe iha pakote ualu. Husi pakote hirak ne’e ida implementa iha Kailaku, tolu iha Balibó no haat iha postu administrativu Bobonaru.
“Estrada rurál foun 2026 pakote ualu ne’e progresu agora 25%, serbisu mós la’o hela”, nia informa iha Maliana, ohin.
Fernando afirma katak munisípiu Bobonaru hetan projetu estrada rurál husi tinan 2021 to’o 2026 ho totál pakote 47, husi númeru ne’e finaliza ona pakote 27 no falta 20, iklui pakote ualu foun 2026 nia mak iha hela progresu no balun paradu.
“Projetu hotu la’o hela, iha pakote haat 2022 nia mak paradu, tanba problema interna kompañia nia ne’ebé ita koko rezolve hela para sira bele finaliza obra ne’e. Kuandu sira la serbisu ita iha xama atensaun ba kompañia sira, balun ita fó xamada dala rua ona kuandu ba dala tolu ami tenke entrega ba sentrál mak rezolve”, nia dehan.
Notísia relevante: Obra Públika Bobonaru halo levantamentu dadus kona-ba estrada rurál iha Soilesu
Projetu reabilitasaun estrada 2026 ho totál distánsia kilómetru 18,45 ne’e mak reabilitasaun estrada Sibuni bá Mapeo-op ho kustu $520.449,94, estrada rurál Sibuni $649.275,06, Leo-Lima Faturui pakote I $404.269,90, Leolima Faturui pakote II $371.025,96, Leo-Lima Faturui pakote II $339.030,44.
Nune’e mos reabilitasaun Plum Concrete Bobonaru Tuluata $259.151,89, reabilitasaun estrada rurál Malilait Taimea $453.143,66, no Projetu FRC Scale-Up Rural Road Kolejiu Manapa $649.275,06. Totál orsamentu pakote ualu ne’e hamutuk $3.193.827,47.
Notísia relevante: Estrada rurál kilómetru 261 iha Bobonaro seidauk reabilita
Jornalista: Sergio da Cruz
Editora: Maria Auxiliadora
