Xefe Suku Abani agradese ba mídia tanba fó-sai informasaun ne’ebé loos ba públiku
OEKUSI, 06 Outubru 2026 (TATOLI)—Xefe Suku Abani, Sub-Rejiaun Pásabe, Rejiaun Administrativa Oekusi Ambenu (RAEOA), Carlos Elu, agradese ba mídia tanba fó-sai informasaun ne’ebé mak loos no kredivel ba públiku relasiona ho povu nia moris.
“Ha’u agradese ba mídia tanba bele mai to’o ona iha ami-nia fatin. Mídia sira-ne’e fó-sai buat ne’ebé mak loos, maibé iha ema barak mós to’o agora seidauk utiliza mídia ne’ebé mak ho loloos,” Carlos Elu ba jornalista sira iha ámbitu ekipa Uniaun Profisaun Jornalista Timor-Leste (UPJTL) disemina informasaun kona-ba importánsia jornalizmu iha Sede Suku, Abani, Tersa ne’e.
Nia haktuir iha joven balun mak seidauk iha koñesimentu atu uza mídia ho loloos, tanba desizaun balun ne’ebé mak fó-sai, sira la tuir ida-ne’e, maibé sira fó-sai buat seluk.
Notísia relevante: Eskola Bázika Terseiru Siklu Pásabe preokupa bee-moos no moru protesaun laiha
“Probema boot iha Timor-Leste ne’e mak ema ne’ebé utiliza mídia seidauk profisionál atu hato’o informasaun ne’ebé mak loos no justu tuir buat ne’ebé mak akontese,” nia informa.
Ho nune’e mak hanesan autoridade lokál Elu iha hanoin atu husu Governu karik bele fó formasaun ba joven sira iha RAEOA atubele hatene oinsá utiliza mídia ho responsabilidade.
“Ha’u rekomenda ba Governu halo polítika oinsá atubele minimiza fa’an sim card sira iha dalan ninin, hanesan meiu ida atu regula informasaun falsa sira iha rai laran, tanba husi ida-ne’e mak hamosu ID falsa hodi trata líder no veteranu sira tuir sira-nia hakarak,” nia sujere.
Iha fatin hanesan, Prezidente Uniaun Profisionál Jornalista Timor-Leste (UPJTL), Horácio Babo, hateten UPJTL halo sensibilizaun informasaun iha sede Suku Abani liuhusi Media Tour hodi komemora Loron Liberdade Imprensa ne’ebé sei monu iha loron 16 Outubru 2026, tanba ne’e mak UPJTL lori jornalista sira ba área rurál hodi hatene dezenvolviementu no atividade sosiál sira iha área referida.
“Ami hakarak atu promove Oekusi liliu dezenvolvimentu sira, hanesan estrada la’o ona ka lae, bee-moos iha ona ka lae. Ida-ne’e mak ami atu mai haree,” nia subliña.
Horácio Babo dehan UPJTL mai Pásabe atu rekolla informasaun sira-ne’ebé akontese iha Pásabe ba públiku atu hatene.
“Ami koko atu halo kobertura ba atividade balun iha Oekusi. Aleinde halo kobertura, ami mós hakarak ko’alia ho komunidade no estudante sira kona-ba importánsia husi mídia tanba dalabarak autoridade lokál sira halo atividade lubuk ida iha suku más iha nasionál lahatene, entaun membru UPJTL hakarak mai foti informasaun ki’ik sira-ne’e hodi halo publikasaun,” nia dehan.
Babo afirma liután katak UPJTL hakarak fahe informasaun balun kona-ba oinsá mak autoridade lokál sira utiliza mídia ho másimu ba interese suku nian. Ezemplu, konserva hela arkivu atividade suku nian nune’e aban bainrua tinan sanulu (10) mai fali arkivu balun lakon maibé husi publikasaun mídia tinan sanulu (10) mai fali sei iha.
“Tuir informasaun ne’ebé mak ami hetan iha Ministériu Administratsaun Estatál (MAE) katak iha suku hotu iha territóriu Timor-Leste ne’e instala ona internet Starlink hodi fasilita ema-nia servisu, entaun dalabarak ministru sira ko’alia katak Starlink atu fasilita dadus sira maibé iha sorin seluk mós bele tulun suku atu publika informasaun sira,” nia konklui.
Jornalista: Felicidade Ximenes
Editór: Xisto Freitas da Piedade
