Eskola Bázika Terseiru Siklu Pásabe preokupa bee-moos no moru protesaun laiha
OEKUSI, 06 Outubru 2026 (TATOLI)—Diretór Eskola Bázika Terseiru Siklu Pásabe, Domingos Mauno, preokupa ho bee-moos ne’ebé mak sai problema ba iha eskola referida, tanba durante ne’e sira utiliza de’it bee-posu no moru protesaun ba eskola ne’e mós laiha.
“Durante ne’e uza de’it bee-matan ida iha mota laran, depoiz taka metin ho simente mak dada sae mai iha-ne’e, maibé to’o bailoron boot bee maran ona,” Domingos Mauno hateten ba jornalista sira iha ámbitu UPJTL halo diseminasaun informasaun ba estudante Eskola Bázika Terseiru Siklu Pásabe kona-ba importánsia jornalizmu nian iha Sub-rejiaun Pásabe, Rejiaun Administrativa Oekusi Ambeno (RAEOA), Tersa ne’e.
Notísia relevante: UPJTL kontinua sosializa importánsia jornalizmu ba estudante sira iha Eskola Bázika Terseiru Siklu Pásabe
Nia afirma solusaun mak Prezidente Autoridade Sub-rejiaun Pásabe nian promete atu dada bee mai no Servisu Água no Saneamentu (SAS) sira mos dehan ona atu dada torneira ida mai iha-ne’e maibé to’o agora seidauk realiza.
“Agora ita ko’alia kona-ba moru protesaun, ami husu ona ba autoridade relevante atu halo maibé buat hotu seidauk iha solusaun, tanba banhira moru protesaun laiha, estudante sira oras seidauk to’o sira fila ona bá uma tanba odamatan barak,” nia afirma.
Domingos relata, kona-ba alojamentu ba profesór sira mós seidauk iha–kestaun ida-ne’e mós preokupante tebes tanba profesór balun husi munisípiu seluk mai hela iha ne’e, maibé fatin laiha.
Kona-ba eskritóriu ba profesór sira, tuir nia, to’o agora mós laiha, ida-ne’e profesór sira uza de’it bibleoteka
Tanba ne’e, nia rekomenda ba Ministériu Edukasaun Rejionál katak Eskola Bázika Terseiru Siklu Pásabe nia problema sira-ne’e hato’o ona, maibé seidauk iha resposta.
Entretantu, estudante Eskola Bázika Terseiru Siklu Pásabe totál hamutuk 375.
Jornalista: Felicidade Ximenes
Editór: Xisto Freitas da Piedade
