Antigu Prezidente Lú Olo sei hetan Prémiu Exelénsia Luzófona iha Portugál
DILI, 07 Outubru 2026 (TATOLI) – Antigu Prezidente Repúblika, Francisco Guterres “Lú Olo” sei hetan kondekorasaun póstumu ba Prémiu Exelénsia Luzófona 2026 durante Gala Prémiu Luzófonia ba da-10, ne’ebé marka ona ba loron 10 fulan-Outubru iha Kazinu Estoril, Portugál.
Harii iha 2017, Prémiu Luzofonia kada tinan fó onra ba figura sira husi komunidade luzófona ne’ebé maka distinge liuhusi sira-nia serbisu no karreira iha área oioin, hahú husi múzika, literatura, no envolvimentu síviku to’o arte vizuál, mídia, teatru, sinema, edukasaun, no dezeñu moda, no seluk tan.
Prémiu Exelénsia Luzófona rekoñese indivíduu sira ne’ebé nia realizasaun sira hatudu impaktu nasionál no internasionál, lideransa, no kontribuisaun ezemplár ida ba komunidade luzofona.
Tuir publikasaun ofisiál husi organizasaun Prémiu Exelénsia Luzófona katak prémiu ne’e loloos atu entrega ba “Lú Olo” bainhira nia sei moris.
“Maski nune’e, destinu deside katak ida-ne’e sei la posivel ona, no okaziaun solene tenke akontese póstumu”, haktuir organizasaun ne’e.
Tuir fonte hanesan, eis-Xefe Estadu nia espoza, Cidália Lopes Nobre Mouzinho Guterres, sei simu prémiu ne’e hodi reprezenta nia kaben.
Omenajen ne’e rekoñese “Lú Olo nia” moris no karreira, ne’ebé marka ho nia partisipasaun iha rezisténsia hasoru okupasaun indonézia no nia knaar iha pozisaun polítika xave sira durante períodu ne’ebé lori ba no hafoin restaurasaun independénsia.
Moris iha loron 07 fulan-Setembru tinan 1954, iha Ossú, Vikeke, Francisco Guterres hakotu iis iha loron 21 fulan-Juñu tinan 2026, iha Malázia, ho tinan 71. Lú Olo nu’udar kaben-na’in no aman ba oan na’in-haat: Francisco Cidalino Guterres (Olo Kai), Eldino Nobre Guterres, Felezito Samora Guterres, no Dálora Guterres.
Antigu Prezidente Lú Olo envolve iha luta libertasaun iha tinan 1974 no mantein iha rezisténsia armada durante tinan 24, hodi asume responsabilidade polítika no militár oioin. Nia nu’udar membru lideransa rezisténsia no, hafoin Konis Santana nia mate iha tinan 1998, kaer diresaun polítika luta Armada Frente Revolusionária ba Timor Lorosa’e Independente (FRETILIN).
Hafoin referendu iha 1999, hala’o papél sentrál hodi reorganiza FRETILIN ba períodu pós-independénsia. Iha tinan 2001, eleitu nu’udar Prezidente Asembleia Konstituinte.
Hala’o knaar nu’udar Prezidente Parlamentu Nasionál husi tinan 2002 to’o 2007 no nu’udar Prezidente Repúblika husi tinan 2017 to’o 2022. Nia iha lisensiatura direitu husi Universidade Nasionál Timor Lorosa’e (Universidade Nacional Timor Lorosa’e).
Iha nia karreira tomak, nia hetan onra husi Estadu timoroan ho Kolár Orden Timor-Leste nian iha tinan 2009 no Kolár Grande Orden Timor-Leste nian iha tinan 2022. Iha tinan hanesan, simu mós Kolár Grande Orden Prínsipe Enrique nian, ne’ebé fó husi Governu portugés.
Jornalista: Arminda Fonseca
Editora: Maria Auxiliadora
