CAC partilla lei númeru 7/2020 ba jornalista
DILI, 07 Outubru 2026 (TATOLI)–Ekipa husi Komisaun Antí-Korrupsaun (CAC, sigla Portugés), Kuarta ne’e, halo sensibilizasaun hodi partilla lei númeru 7/2020, 26 Agostu kona-ba Medida Prevensaun Kombate Korrupsaun (MPCC) ba jornalista sira ho tema: “Hasa’e koñesimentu no kapasidade jornalista sira hodi kontribui ba transparénsia, integridade no responsabilizasaun.”
Jornalista na’in-40 husi Ajénsia Notisioza Timor-Leste, Institutu Públiku TATOLI (TATOLI, I.P), Rádiu Televizaun Timor-Leste, Empreza Públika (RTTL, E.P), Timor Post, Independente, STL, GMN-TV no mídia balun tan husi plataforma eletróniku no imprimi mak partisipa iha atividade ne’e.
Komisáriu CAC Rui Pereira dos Santos, hateten, sensibilizasaun hanesan ne’e realiza dala-rua ona, dahuluk iha tinan 2015, ne’ebé ho objetivu atu hasa’e koñesimentu jornalista sira atubele komprende CAC nia serbisu bazeia ba nia kriasaun, Lei MPCC no utilizaun termu jurídiku sira.
“Jornalistas sira nu’udar formandu iha sensibilizasaun durante loron-ida atubele iha koñesimentu iha setór justisa, hetan matéria ne’ebé mak bele no labele públika, no presiza halo konfirmasaun ba fontes kredível sira iha asuntu prevene no kombate korrupsaun nian,” Komisáriu Rui hato’o durante nia intervensaun bainhira loke atividade sensibilizasaun ne’ebé hala’o iha salaun Autoridade Munisípiu Dili, Matadoru.
Notísia relevante : CAC sosializa lei MPCC ba Kargu Xefia iha MAPKOMS
Sensibilizaun ne’e tanba bazeia ba lei númeru 7/2020, 26 Agostu, artigu 27, katak CAC mós bele halo sensibilizaun ba jornalista sira.
Biban ne’e, Komisáriu CAC rekoñese mídia sira-nia prezensa iha kobertura, tanba instituisaun ne’e mesak labele partilla informasaun.
“Ita-boot maluk mídia sira mak sai matan no tilun ba Komisaun Antí-Korrupsaun nian,” nia akresenta.
Komisáriu dehan, CAC nia odamatan sempre nakloke ba jornalista sira atu hato’o keixa ba investigadór liuhusi meiu sira ne’ebé iha ona.
“Atu nune’e ita hotu-hotu hamutuk hodi prevene no kombate korrupsaun,” nia katak.
Jornalista : Natalino Costa
Editora : Julia Chatarina
