EBC Traducama enfrenta problema menus profesór no livru
KOVALIMA 07 Outobru 2026 (TATOLI)- Eskola Ensinu Básiku Central (EBC) Traducama, Suku Nanu, Postu Administrativu Fatumea, Munisípiu Kovalima enfrenta problema menus profesór no livru kurikulu, ne’ebé eskola konsidera bele afeta kualidade aprendizajen ba alunu sira.
“Iha eskola ne’e estudante hamutuk 67 hosi setimu ano to’o nonu ano , maibé iha de’it profesór na’in lima atu hanorin matéria 11 nune’e falta profesór ba disiplina Lian Inglés. Problema falta profesór ne’e mós akontese iha Eskola Ensinu Básiku Filial (EBF) tolu ne’ebé tama iha administrasaun EBC Traducama,”Diretór EBC Traducama, Gilberto dos Reis, afirma ba jornalista sira, iha biban TLPU organiza Media Tour hodi komemora loron Nasional Liberdade Imprensa.
Iha EBF Macocon ho estudante husi primeiru ano no to’o sestu anu hamutuk 64, ho profesór na’in-tolu. EBF Dacolo mós iha estudante na’in-64 hosi primeiru anu to’o sestu anu ho profesór na’in tolu.
Enkuantu EBF Mahein Foho, iha estudante hamutuk 40 hosi primeriu anu to’o terseiru anu, maibé iha de’it profesór ida atu atende estudante sira.
“Kondisaun ne’e obriga estudante hosi klase oinoin atu aprende hamutuk iha sala ida, tanba profesór ida tenke hanorin klase sira iha tempu hanesan. Prosesu hanorin iha EBF Mahein Foho profesór na’in ida deit mak hanorin. Nia tenki tau hamutuk estudante hosi klase oioin iha sala ida, tanba se fahe sala sei difisil,” dehan Gilberto.
Probelema ne’e, nia dehan hato’o ona ba Servisu Munisipál Edukasaun Kovalima iha 2024 no relata fali iha 2026, maibé to’o agora seidauk iha kolokasaun profesór foun ba eskola sira iha área fronteira.
Livru Siklu 21 seidauk Kompletu
Aleinde falta profesór, EBC Traducama no EBF hirak ne’e falta livru kurikulu Siklu 21 ba matéria oioin, inklui Matematika, Lian Portugés, Lian Tetun no Lian Inglés.
“Bazeia ba Siklu 21, setimu anu implementa ona, maibé to’o agora ami iha de’it ivru ba períodu dahuluk. Agora ita tama ona ba períodu datoluk,” nia hateten.
“Ami sente triste tanba livru la kompletu, estudante sira mos simu matéria hosi profesór sira la kompletu,” nia hateten.
Ho kestaun ne’e, Adjuntu Diretór EBC Traducama, Fernando Magno, hatete falta profesór obriga membru diresaun eskola atu tama diretamente iha sala aula hodi ajuda hanorin estudante.
“Ami iha estudante hamutuk 67, maibé profesór iha na’in haat deit mak hanorin, inklui ami dirijente,” Fernando hateten.
Notisia relevante:TLPU fahe informasaun kona-ba literásia dijitál ba estudante sira iha Kovalima
Jornalista:Celestina Teles
Editór:Florencio Miranda Ximenes.
