TLPU fahe informasaun kona-ba literásia dijitál ba estudante sira iha Kovalima

KOVALIMA,06 Outubro 2026 (TATOLI) – Timor Leste Press union (TLPU) fahe informasaun kona-bá Litérasia Dijitál ba alunu sira iha eskola neen Munisípiu Kovalima.

TLPU fahe informasaun iha Eskola hanesan, Eskola Bázika Sentrál Dais iha Suku Belekasak, Postu Maucatar, Eskola Bázika Centrál Salele,iha Suku Maudemo Postu Administrativu Tilomar,Eskola Bázika Centrál Traducama, EBC Fatumea, Postu administrativu Fatumea no eskola Sekundáriu Jerál Públiku Suai.

Aleinde ne’e hala’o vizita mós oan-kiak ho naran Arista, hasoru inan faluk iha Belulik Leten no mós entrega uniforme desportiva ba alunu sira.

TLPU fahe informasaun ba alunu sira liu-husi programa média Tour iha ámbitu hodi komemora loron Liberdade Imprensa no Loron Balibo Five sei komémora 16 Outobru 2026 ba tinan-51.

Prezidente TLPU, Candido Alves, dehan, atividade TLPU faje informasaun sira ba alunu iha ambitu hodi komemora loron Liberdade Imprensa no Balibo five nian, nune’e fahe informasaun kona-bá koñesimentu Litérasia Dijitál no papél Jornalista no servisu média nian ba alunu sira.

Candido Alves dehan, utiliza dijitalizasaun média-sosiál iha nia impaktu negativu no pozitivu, nune’e estudante sira presiza hatene oinsa utiliza, nune’e bele fó benefisiu ba sira.

“Bainhira akompaña informasaun iha media-sosial tenke taes ho didiak husi média konvensional sira, labele rona de’it, maibé tenki verifika didiak”, Prezidente TLPU Candido Alves, fahe ba alunu sira, iha Kovalima

Prezidente TLPU mós husu ba alunu sira atu akompaña informasaun sira iha media sosiál ho di’ak, verifika no mós akompaña informasaun husi media konvensional ka estatál sira.

Nia esplika ba estudante sira katak, Litérasia dijitál mak kapasidade estudante sira atu uza teknolojia dijitál ho konfiansa, responsabilidade no kritiku. La’ós de’it hatene uza telemóvel ka komputadór, maibé mós hatene buka, avalia, analiza, produz no fahe informasaun ho maneira seguru no étika.

Ba estudante sira, litérasia dijitál importante tanba sira hetan informasaun barak liuhusi Facebook, TikTok, YouTube, Instagram, WhatsApp, Google no plataforma edukasaun online. Maibé la hotu-hotu informasaun iha internet mak loos. Tanba ne’e, estudante presiza aprende atu “hanoin kritiku molok klik no fahe.

Ba aprendizajem, estudante tenki uza media sosiál atu buka matéria edukativu, video aula, diskusaun no fonte informasaun ne’ebé konfiável.

Estudante mós verifika informasaun, molok fahe notícia ka informasaun, haree sé mak fonte, data publikasaun no kompara ho fonte seluk.

Proteje privasidade la fahe password, númeru telefone, dokumentu privadu, lokalizasaun ka fotografia sensível ho ema ne’ebé la konfiável. Uza linguajen respeitu la halo insultu, bullying, ameasa ka diskriminasaun iha komentáriu no publikasaun.

Estudante tenke evita uza media sosiál durante tempu aula ka to’o prejudika estudu no deskansa. Kria kontéudu positivu estudante bele uza media sosiál atu fahe koñesimentu, kultura, edukasaun no atividade komunidade.

Biban ne’e, Prezidente TLPU mós partilla ba estudante sira kona-bá servisu Jornalista.

Tuir nia, Jornalista mak ema ne’ebé servisu atu buka, verifika, analiza no hato’o informasaun ka notísia ba públiku liuhusi meiu komunikasaun hanesan jornal, rádio, televizaun, website no media sosiál.

“Estudante sira presiza komprende katak jornalista nia responsabilidade la’ós de’it hakerek notísia, maibé mós tenke garante katak informasaun ne’ebé hato’o ba públiku mak loos, independente, justu no bazeia ba faktu”.

Iha fatin hanesan, Adjunto Diretor EBC Dais, Santiago do Nascimento Amaral hato’o agradese ba TLPU realiza programa Tour hodi fahe informasaun ba estudante no profesór sira.

“Ami agradese tebes asosiasaun Jornalista ida ne’e mai fahe informasaun importante tebes oinsa aumenta koñesimentu estudante sira nian, oinsa hatete kona-bá utiliza media sosial, karik sira hatene uza sira bele hatene impaktu negativu no positivu”, nia dehan.

Nia dehan, koñesimentu kona-bá Litérasia Dijital importante tebes ba estudante sira atu bele hatene informasaun kredivel no lops.

Tuir nia, era dijital persiza tebes hatene kona-bá lalaok sira ne’e, nune’e mós persiza hatene kona-bá servisu jornalista nian, nune’e bele akompaña informasaun sira loos no klaru.

“Ami hatene ituan, maibé persiza hatene liu tan, tanba ne’e ho informasaun sira ne’e bele hatene liutan, oinsa uza media sosial ne’e tuir impaktu pozitivu, entaun ho informasaun sira ne’e importante, nune’e halo buat ruma labele viola lei no labele viola privasidade”, nia hato’o.

Enkuantu, materia ne’ebe TLPU partilla ba estudante sira kona-bá Liberdade Imprensa no Liberdade Espresaun, hatene servisu jornalista, nomós oinsa hatene kona-bá utiliza media sosial inklui partilla mós kona-bá komemora loron Nasionál Liberdade Imprensa no Komorasaun Loron Balibo five nian.

Apoiu Ekipamentu Desportu

Iha biban ne’e, Prezidente TLPU, Candido Alves, mós lori TLPU apoiu mós ekipamentu Desportu nian ba estudante sira hanesan farda Desportu nian, Sapatu no seluk tan, ne’ebe entrega direta ba eskola sira.

Candido Alves husu bá estudante sira atu utiliza ekipamentu Desportu nian hodi hala’o atividade desportu nian, hodi bele aleva sira-nia abilidade no koñesimentu desportu nian.

Nune’e, Responsalvel EBC Dais, hato’o agradese bá TLPU ne’ebé ho inisitiva apoiu ekipamentu desportu nian.

Bazeia ba ajenda katak Asosiasaun Jornalist hala’o atividade sosializasaun , Eskola ne’ebé mak alvu sosializa informasaun impaktu utilizasaun media sosial mak hanesan Eskola Bázika Centrál (EBC), Eskola Bázika Centrál,vizita oan kiak iha suku Nanu postu administrativu Fatululik.

Notísia relevante: TLPU apoia nesesidade bázika ba oan-kiak na’in ualu iha suku Nanu

Jornalista: Celestina Teles

Editór: Florencio Miranda Ximenes