TLPU apoia nesesidade bázika ba oan-kiak na’in ualu iha suku Nanu
KOVALIMA, 06 Outubru 2026 (TATOLI) – Timor-Leste Press Union (TLPU) apoia nesesidade bázika ba oan-kiak na’in ualu iha Suku Nanu, Postu Administrativu Fatumea, Munisípiu Kovalima.
Nesesidade bázika ne’e kompostu husi foos kilograma 25 ho saku rua, supermie kaixa rua, kafe Tugu Buaya, mina tein litru lima no bee minerál kaixa ida.
Prezidente TLPU, Cândido Alves, dehan apoiu ne’e hanesan parte husi komemorasaun Loron Imprensa no TLPU foti desizaun atu apoia família ne’ebé presiza liuliu iha área fronteira.
“TLPU foti desizaun atu fó apoiu ba ema ne’ebé presiza iha liña fronteira. Ami hetan informasaun husi xefe suku sira katak oan-kiak naiin-ualu ne’e, nia inan Carista Gusmão mate ona, nune’e oan-kiak na’in ualu ne’e presiza tulun,” dehan Cândido Alves ba jornalista sira hafoin entrega apoiu iha Suku Nanu.
Nia hateten katak apoiu ne’e la haree de’it ba kuantidade, maibé liuliu ba solidariedade no vontade atu ajuda família sira ne’ebé presiza.
Iha fatin hanesan, Bin ne’ebé tau matan ba oan-kiak na’in-8, Carista Gusmão, konta katak durante tinan haat nia mak tau matan ba nia alin sira tanba sira-nia inan laiha ona.
“Ami nia inan laiha ona, nune’e ha’u mak sai inan ba ha’u nia alin sira durante tinan haat. Ha’u tenke halo to’os no bainhira hahan laiha, viziñu sira mak ajuda ami. Situasaun ne’e sente todan,” nia konta.
Carista hakarak kontinua nia estudu iha ensinu superiór, maibé la konsege kontinua tanba falta rekursu no nia mós tenke tau matan ba nia alin sira.
Nune’e, nia agradese ba estrutura TLPU ne’ebé apoia nesesidade bázika ba sira.
Entretantu, Xefe Suku Nanu, Abel Mendonça, hato’o agradese ba estrututaTLPU tanba fó apoiu nesesidade bázika ba família ne’e.
“Ha’u hato’o agradese ba TLPU tanba fó apoiu nesesidade bázika ba oan kiak na’in ualu iha Suku Nanu, Postu
Administrativu Fatumea. Ho apoiu ne’e, sira bele aguenta no responde ba nesesidade loroloron nian,” dehan Abel Mendonça.
Jornalista: Celestina Teles
Editór: Florencio Miranda Ximenes
