Komisáriu CAC informa ona ba PR no PM kona-ba avokasaun prosesu husi PGR
DILI, 07 Outubru 2026 (TATOLI)—Komisáriu ba Komisaun Antí-Korrupsaun (CAC, sigla portugés) Rui Pereira dos Santos, informa ona situasaun liga ba Prokuradór Jerál Repúblika (PGR), Nelson de Carvalho, ne’ebé avoka ka deside la delega hikas kazu korrupsaun ba CAC.
“Preokupasaun ne’e CAC aprezenta ona ba Primeiru-Ministru (PM) liuhosi karta formál, haruka mós karta ba Parlamentu Nasionál (PN) no halo ona audiénsia ho deputadu sira. Aleinde ne’e, fulan-rua liubá, Komisáriu CAC hasoru ona Prezidente Repúblika (PR), José Ramos-Horta hodi informa situasaun,” Rui Pereira hateten iha nia intervensaun bainhira abertura sensibilizasaun lei númeru 7/2020, 26 Agostu kona-ba Medida Prevensaun Kombate Korrupsaun ba Jornalista sira iha salaun Administrasaun Munisipál Dili, Kuarta ne’e.
Nia dehan, PR komunika Ministériu Públiku tenke konsidera no apresia kontribuisaun husi órgaun investigasaun kriminál sira ne’ebé ajuda ona iha prosesu kombate krime.
“Tuir lei, kazu korrupsaun bele delega ba CAC, la’ós limita eskluzivamente ba Polísia Sientífika Investigasaun Kriminál. Tanba ne’e, ha’u husu atu buka klarifikasaun kona-ba kompeténsia investigasaun korrupsaun no prosesu delegasaun kazu,” nia subliña.
Notísia relevante : MP kontinua avoka prosesu kazu korrupsaun ba CAC
Komisáriu Rui mós husu ba mídia sira atu kontinua halo kontrolu sosiál. “Ami husu ba maluk mídia sira atu loke matan hodi haree situasaun ne’e.”
Nia dehan, bainhira Ministériu Públiku la delega lalais kazu korrupsaun ba CAC ne’e hafraku tiha CAC nia serbisu.
“Korruptór sira ne’e sira bá iha CAC mak tauk, se CAC nia liman-ain tohar tiha ona no nehan mós laiha, korruptór sira bele halo atividade ne’e ho avontade. Situasaun ne’e bele hamate CAC nia kbiit atu kombate korrupsaun, maski lei fó kompeténsia espesífika ba CAC,” nia lamenta.
Rui hateten, iha kazu korrupsaun 10 mak CAC remete ona ba Ministériu Públiku maibé to’o agora instituisaun ne’e seidauk delega hikas fali mai CAC atu kontinua investiga.
Nia dehan, situasaun ne’e desde kedan iha tinan kotuk no agora sedauk solusaun. Tanba kazu korrupsaun barak ne’ebé CAC halo ona averiguasaun besik tinan-ida maibé to’o agora Ministériu Públiku seidauk redelega atu CAC kontinua prosesu.
Jornalista : Natalino Costa
Editora : Julia Chatarina
