Konstrusaun Uma Dignu iha Tunubibi atinje 75%
BOBONARU, 07 Outubru 2026 (TATOLI)-Projetu Konstrusaun Uma Dignu iha aldeia Tunubibi, suku Tapo-Memu, postu administrativu Maliana, munisípiu Bobonaru, nia progresu fizíku atinje 75%.
Enjeñeiru Kompañia Rics Unipessoal Lda, Marcos Mau Laca, konfirma katak falta uma haat mak nia konstrusaun la’o atraza.
“Uma unidade 25 kuaze taka hotu ona kalen, sei iha uma haat mak seidauk plester, seluk-seluk ne’e plester hotu ona, iha balu mak ita tama faze finalizasaun para entrega ba ita-nia benifísiariu sira”, nia informa ohin.
Mau Laca subliña katak maski hasoru difikuldade oioin empreza nafatin iha responsablidade atu finaliza obra ne’e.
“Fiar katak kompañia sei entrega ba Governu iha tempu badak, depois Governu sei entrega ba komunidade benifisiária sira”, nia dehan.
Iha sorin seluk, benefisiária Joana Moniz Lopes kontenti no hakarak atu hela ona iha uma foun ne’ebé konstrui ne’e.
“Ami kontente maski hein kle’ur. Ninia prosesu loloos ne’e ramata iha tinan kotuk ne’ebá, komu dada tempu ho ida-ne’e mak ami sente triste uitoan, maibé ne’e planu Governu nian. Ami benefisiáriu ne’e hein simu de’it”, nia realsa.
Notísia relevante: Governu tau ona timeline ba implementasaun Uma Dignu iha Tunubibi
Tuir observasaun jornalistab Tatoli, kuaze uma barak mak hein monta odamatan no janela hodi finaliza 100%.
Uma ne’e konstrui ho totál unidade 25 no obra ne’e gasta orsamentu hamutuk $798.762,62 ne’ebé tuir kontratu loloos ne’e ramata iha loron 04 Jullu 2025.
Notísia relevante: Advogadu husi Empreza Rics klarifika konstrusaun Uma Dignu iha Tunubibi
Jornalista: Sergio da Cruz
Editora: Maria Auxiliadora
