SEDL lansa resensiamentu eleitorál biométriku iha Tilomar
KOVALIMA, 07 Outubru 2026 (TATOLI) – Sekretáriu Estadu Dezenvolvimentu Lokál (SEDL), Mateus dos Santos Tallo, hamutuk ho Autoridade Munisípiu Kovalima no Postu Administrativu Tilomar, Kuarta-feira, lansa Resensiamentu Eleitorál Biométriku iha Postu Administrativu Tilomar, Munisípiu Kovalima.
Lansamentu ne’e realiza liuhusi kooperasaun ho Servisu Téniku Administrasaun Eleitorál (STAE), hodi hakbesik atendimentu eleitorál ba komunidade, liuliu iha prosesu rejistu, atualizasaun no verifikasaun dadus eleitorál.
“Resensiamentu eleitorál importante tebes tanba eleisaun presiza preparasaun no hahú hosi dadus eleitorál ne’ebé loos, kompletu no atualizadu. Eleisaun la mosu mesak. Eleisaun presiza preparasaun no preparasaun hahú ho dadus”, SEDL hateten iha serimónia lansamentu resensiamentu eleitorál iha Postu Administrativu Tilomar.
Governu deside hala’o resensiamentu eleitorál tanba razaun prinsipál tolu mak atu garante lista eleitorál ne’ebé moos, justu no loos, apoia prosesu dezenvolvimentu lokál no desentralizasaun no prepara dadus eleitorál ba futuru dezenvolvimentu iha munisípiu sira, inklui Kovalima ne’ebé nu’udar munisípiu fronteira ho potensialidade iha setór agrikultura no ekonomia.
Nia husu Autoridade Munisípiu no administradór postu administrativu tenke fasilita STAE atu asesu ba komunidade, inklui suku no aldeia remota sira hodi asegura sidadaun hotu bele asesu ba servisu resensiamentu.
“Labele husik ema ida iha kotuk. Prosesu ne’e livre, seguru no la selu. Sidadaun sira lori de’it Billete Identidade (BI) no kartaun eleitorál tuan. Se seidauk iha STAE sei halo foun”, nia afirma.
Timor-Leste luta tinan 24-resin atu hetan direitu ba vota no resensiamentu ne’e sai oportunidade ba sidadaun atu asegura sira nia direitu eleitorál.
Iha fatin hanesan, Administradór Postu Administrativu Tilomar, Venâncio Sarmento, hato’o apresiasaun ba IX Governu Konstitusionál tanba hakbesik atendimentu eleitorál ba nivel postu administrativu.
“Ami sente orgullu tebes tanba IX Governu, liuhosi STAE halo lansamentu resensiamentu Eleitorál iha postu administrativu sira no fasilita ami nia komunidade atu trata eleitorál. Resensiamentu ne’e sei ajuda atualiza no konfirma dadus eleitorál, inklui rejista sidadaun foun ne’ebé iha direitu atu vota”, Venâncio Sarmento hateten.
Bazeia ba oráriu atendimentu, Resensiamentu Eleitorál iha Postu Administrativu Tilomar hahú iha 07 Outubru 2026 no sei hala’o to’o Janeiru 2027.
Notisia relevante: STAE hakbesik atendimentu REABD biométriku ba eleitór iha Kailaku
Jornalista: Celestina Teles
Editór: Florencio Miranda Ximenes
