STAE hakbesik atendimentu REABD biométriku ba eleitór iha Kailaku
BOBONARU, 07 Outubru 2026 (TATOLI) – Sekretariadu Tekniku Administrasaun Eleitorál (STAE) Munisípiu Bobonaru lansa atendimentu ba Resensiamentu Eleitorál Atualizasaun Baze Dadus (REABD) ho sistema biometriku ba sidadaun iha postu administrativu Kailaku.
Diretór STAE Bobonaru, José Guterres, hatete katak atividade ne’e sai parte husi preparasaun atu atende eleisaun sira ne’ebé sei realiza iha 2027.
“Lansamentu ida-ne’e iha territóriu tomak sai hanesan preparasaun atu atende eleisaun sira ne’ebé ita sei hasoru iha tinan 2027”, José Guterres afirma iha salaun postu administrativu Kailaku.
Nia salienta katak númeru eleitór rejistadu iha munisípiu Bobonaru aumenta husi rihun 74 ba rihun 77, inklui eleitór foun liu 2.000.
Biban ne’e diretór ne’e husu ba sidadaun sira iha Kailaku ne’ebé seidauk atualiza dadus eleitór atu aproveita oportunidade ne’e, inklui joven sira ne’ebé atinje ona idade 17 no sidadaun sira ne’ebé seidauk rejista nu’udar eleitór.
“Eleitór Bobonaru seidauk to’o rihun 80. Tanba ne’e, STAE hakbesik-an hodi loke sentru atendimentu iha kada postu administrativu”, nia dehan.
Prezidente Autoridade Munisípiu Bobonaru, Paulo Moniz Maia, konsidera lansamentu REABD ho sistema biometriku nu’udar eventu importante tanba moderniza sistema administrasaun eleitorál.
“Agora, ita moderniza ona sistema eleitorál ba sistema avansadu, ne’ebé hanaran sistema biométriku. Sistema ida-ne’e importante atu garante dadus eleitór no kartaun eleitór labele duplika”, Paulo Moniz Maia realsa.
Nia mós apela ba sidadaun hotu atu partisipa iha resenseamentu eleitoáal atu ezerse direitu sira iha eleisaun 2027 no 2028.
Xefe Suku Raiheu, Ventura Maria Tai, agradese ba STAE tanba hakbesik ona servisu atendimentu ba nivel postu administrativu, maibé husu atu programa ne’e bele to’o mós iha suku sira ne’ebé dook.
Notísia relevante: STAE Bobonaru lansa REABD movel prodús kartaun biométriku ba Idozu-EhD
“Ita haree Suku Atudara no Raiheu distánsia dook tebes atu bá postu Kailaku. Presiza to’o iha ne’ebá atu katuas no ferik sira ne’ebé la’o la di’ak bele atualiza dadus eleitór”, nia sujere.
Tuir autoridade ne’e, komunidade iha Raiheu maioria seidauk atualiza dadus biométriku tanba hela dook husi sentru atendimentu iha postu administrativu Kailaku, ne’ebé mosu dezafiu ba komunidade atu asesu ba servisu.
Notísia relevante: STAE Bobonaru halo REABD Biométriku ba EhD no idozu 6.110
Jornalista: Sergio da Cruz
Editora: Maria Auxiliadora
