Empreza Tsuneishi rekruta joven timoroan na’in-ualu tuir treinamentu soldadura iha Japaun

DILI, 08 Outubru 2026 (TATOLI)-Empreza Tsuneishi halo teste ba joven timoroan na’in-33 hodi bá tuir treinamentu servisu iha área soldadura (welding), pinta (painting), no finishing iha Fukuyama, Hiroshima Prefecture, iha Provínsia Japaun.

Asesór Sekretáriu Estadu Formasaun Profisionál no Empregu (SEFOPE), Ilídio Ximenes, hatete rekrutamentu skill test ne’e hala’o horsieik, iha Sentru Formasaun Tíbar, maibé husi númeru ne’e empreza sei presiza de’it mak na’in-ualu.

“Totál kandidatu tuir skill test ne’e hamutuk na’in-33, ne’ebé sei rekruta de’it mak ema na’in-ualu, katak tolu ba Soldadura, na’in tolu ba finishing no rua ba pinta”, Ilídio Ximenes hatete ba Tatoli via WhatsApp.

Nia esplika katak hafoin skill test iha loron ne’e kedas empreza-na’in mós fó kedas entrevista ne’ebé diretamente husi instrutór sira husi kompañia mak Naoya Shimomura, Diretór-Jerál Tsuneishi Tekko, Co, Ltd, Katsufumi Takada, no Diretór-Jerál Lhara Co, Ltd., Takahiro Nakamura.

“Husi ne’e hatudu katak daudaun iha ona joven timoroan 31 mak iha Fukuyama hodi aprende no serbisu iha área konstrusaun sivíl hanesan soldadura no pinta ró-ahi no sira na’in-ualu ne’e sei tuir formasaun lia-japonés no kultura iha Dili antes sira mai Japaun”, Ilídio dehan.

Tuir nia, programa ne’e realiza liuhusi koperasaun entre Governu ho Governu ne’ebé hanaran Technical Intern Training (TIT). Treinamentu ne’e tuir kontratu halo tinan tolu.

“Ita-nia joven na’in-ualu ne’ebé sei mai Japaun ne’e hanesan preparasaun husi empreza hodi prepara sira ba fábrika halo ró iha Laleia nian ne’e”, nia salienta.

Tuir Ilídio, fulan ida-ne’e sei iha tan teste online ba área de Aged Care no Agriculture. 

Jornalista: Arminda Fonseca 

Editora: Maria Auxiliadora