Oportunidade ba estudante UNTL Períodu 2014 taka ona
DILI, 08 Outubru 2026 (TATOLI)–Reitór Universidade Nasionál Timor Lorosa’e (UNTL), Joviano António da Costa, informa UNTL taka ona oportunidade ba estudante turnu 2014 ne’ebé seidauk kompleta sira-nia estudu, liuliu ba sira-ne’ebé la ativa ka la halo rejistu durante tinan balun.
Reitór UNTL antes ne’e fó ona oportunidade ba estudante sira-ne’ebé seidauk konklui estudu atu ativa fali sira-nia estatutu estudante.
“Estudante balun la ativa tanba komesa servisu, kontinua formasaun iha fatin seluk ka la halo ona rejistu nu’udár estudante iha universidade,” Joviano dehan iha Palms Spring Hotel, Fatuhada, Kinta ne’e.
Tuir Joviano katak estudante ne’ebé seidauk konklui estudu maibé kontinua halo rejistu sei konsidera nu’udár estudante ativu.
Maibé, nia dehan, situasaun estudante turnu 2014 presiza haree tuir dadus no estatutu estudante idaidak, tanba estudante balun bele iha razaun diferente, inklui tanba servisu ka kontinua kursu iha instituisaun seluk.
Rekorda katak estudante sira-ne’ebé mak sistema UNTL esklui ona iha períodu 2.000 to’o 2012 hamutuk 8.850. Enkuantu, périodu 2013 to’o 2018 hamutuk 7.147.
UNTL iha fakuldade sanulu (10) kompostu husi Fakuldade Agrikultura, Fakuldade Enjeñaria, Siénsia no Teknolojia, Fakuldade Edukasaun Umanidade, Fakuldade Medisina, Siénsia Saúde, Fakuldade Ekonomia Jestaun, Fakuldade Direitu, Fakuldade Siénsia Sosiál no Polítika, Siénsia Ezata no Naturál, Fakuldade Turizmu, Arte, Indústria Kriativa no Kulturál. Enkuantu, departamentu hamutuk 44, dosente 400-resin no estudante 40.000-resin.
Jornalista: Osória Marques
Editór: Xisto Freitas da Piedade
