Panorama Orsamentál 2027 akontese iha semana oin
DILI, 08 Outubru 2026 (TATOLI) – Parlamentu Nasionál sei realiza Panorama Orsamentál 2027 iha loron 14 fula-Outubru, iha edifísiu Ministériu Finansa, Aitarak-Laran, Dili.
Vise-Prezidente Komisaun C, Francisco da Costa “Ikulai”, dehan komisaun halo ona aprovasaun ba kalendáriu diskusaun ba proposta Lei Orsamentu Jerál Estadu (OJE) 2027, ne’ebé sei hahú ho semináriu ne’e konvida parte Ezekutivu, entidade Estadu, parseiru internasionál no seluk tan.
Iha loron 19 to’o 23 Outubru, komisaun sira sei halo audiénsia públika ho liña ministeriál sira, diskusaun faze jeneralidade iha 09 to’o 11 Novembru, no espesialidade iha 13-26 Novembru hodi kontinua kedas votasaun finál globál.
Iha 05 Outubru 2026, Meza Parlamentu Nasionál, liuhusi reuniaun plenária halo anúnsiu admisaun no baixa ba Komisaun C no Komisaun Espesializada Permanente sira kona-ba proposta Lei númeru 33/VI(4a)-Orsamentu Jerál Estadu ba 2027.
Prezidente Parlamentu Nasionál, Maria Fernanda Lay, husu ba komisaun sira atu prepara pareser no kalendáriu audiénsia, debate jeneralidade, espesialidade no finál globál.
Nia sujere ba deputadu sira atu prepara didi’ak audiénsia públika ho rigór preokupasaun sira balun ne’ebé durante ne’e levanta iha plenária, hanesan kestaun infraestrutura bázika no seluk tan hodi akomoda iha ne’ebá.
Lembra katak, iha 01 Outubru, Governu liuhusi Ministériu Finansa submete proposta Lei OJE 2027 ho montante billaun $2,6 ba Parlamentu Nasionál.
Notísia relevante: http://Governu aprezenta Proposta Lei OJE 2027 ba Parlamentu Nasionál –
Jornalista: Nelson de Sousa
Editora: Maria Auxiliadora
